■反對派5名議員缺席蟲泰議案投票。成日自稱「關鍵一席」嘅反對派立法會議員，投票時再一次「關鍵缺席」？雖然已經唔係咩新聞，但呢種政棍嘴臉都係要揭示畀大家睇嘅。經常監察議員投票情況嘅facebook專頁「無神論者的巴別塔」前晚又點名批評民主黨涂謹申、尹兆堅，「街工」白頭佬（梁耀忠）、公民黨郭榮鏗同衛生服務界個李國麟缺席投票，令「熱血公民」個蟲泰（鄭松泰）喺立法會內務委員會提出要調查沙中線事件一事被輕易否決。「巴別塔」質問︰「乜你地唔係好×關注要用P&P（特權法）查沙中線工程架（㗎）咩？哦原來去到（投）票就可以唔投、齋吹就得？」
fb專頁揭鴿訟等缺席投票
成日都捉到班人唔出席開會投票，咩議題都可以話唔出現就唔出現，「巴別塔」噚日都大字標題寫「循例一貼」，去反映呢班反對派議員例牌失蹤嘅情況。
亦由於呢啲情況唔係第一次出現，「巴別塔」都預咗實會有人話「就算5個全部出席，表決仍然會以26:26+兩票棄權而不獲通過」、「內會過唔倒一樣可以響大會提架（㗎）」、「內會過倒（到）咪一樣可以響大會被否決」、「建制派見你多幾個人咪派多幾個人黎（嚟）投反對票囉，你唔係咁天真以為可以贏下話」。
不過，「巴別塔」就反問︰「乜你地（哋）唔係好×關注要用P&P查沙中線工程架（㗎）咩？哦原來去到（投）票就可以唔投、齋吹就得？」佢仲話，反正選呢班人入去，佢哋投票都係輸硬，「然後你地（哋）就用呢個藉口黎（嚟）解釋點解成日可以偷懶唔投票，係咁嘅話，選你班友入去做乜？乾逗（??）人工？投你『飯（泛）民』同投建制，又有咩分別？」
網民寸「自由度真高」
網民有啲睇到麻木，有啲依然憤怒。「Ben Li」反問︰「又缺席呀？」「Mui Ying Ling Allard」已經用大學生標準去衡量話︰「議員人工真好搵，唔使日日番（返）工，重（仲）可以走堂，自由度真高！」「Raymond Chan」亦驚嘆︰「每個月九萬六蚊，仲有什麼什麼津貼，當然未計約滿酬金，但連最基本出席都做唔到？每一個星期都比（俾）人捉到呢？」
其他「獨」派都乘機打擊政敵。「香港民族陣線」就話佢哋連盡力而為都唔肯，「咁就真係睇唔出仲有邊忽關鍵，不過講開又講，講『必死的覺悟』嗰個都未死，所謂關鍵，理所當然地都只係過下口癮。」
「無待堂堂主」盧斯達亦話︰「個個都唔投票，咁維持『泛民』大台呢樣野有咩用？當時個個都話『關鍵一席』、要『保持否決權』的人，會否切腹？」「Charlie Lok」就睇得通透︰「點會？仲要兩年後（立法會換屆選舉）翻炒講多次。」咁又係，班反對派支持者反正點都會含淚投票㗎啦，show都唔做好奇咩？ ■香港文匯報記者 甘瑜