有意參加立法會九龍西補選的「瀆誓四丑」之一小麗老千（劉小麗），此前冧掂一批反對派大佬，同意佢欽點前議員李卓人做佢Plan B，根據地喺正九西嘅民協就一直覺得唔多妥，認為應該要初選。民協副主席何啟明近日向傳媒表明反對，話應該透過初選凝聚反對派支持者嘅共識。
不過，人哋已經同班大佬講掂數，當然唔理你啦！有網民就慨嘆，小麗老千夾埋反對派大佬咁樣霸王硬上弓，仲有咩面掛住「民主」兩個字。有人更質疑，其他反對派大佬係想乘機吞咗民協地盤，為擴張勢力而要滅佢黨。
「香港眾志」周庭此前報名參加立法會港島區補選，其後被DQ，未有再經初選就直接欽點退出民主黨嘅區諾軒做替身，結果贏咗。
其後，「四丑」之一姚松炎參加初選勝出，但因為佢同佢支持者猛咁攻擊本來按機制可做佢Plan B嘅馮檢基搞散支持者，兼夾宣傳離地而落敗，但佢就賴話係初選浪費時間搞到佢唔夠時間搞宣傳喎。
小麗老千就用呢兩單嘢，話唔應該初選「浪費時間」，話應該用「周庭模式」，仲直接欽點同其他反對派大佬嘅好朋友李卓人做Plan B。
喂阿姐，港島當時冇搞初選所以冇Plan B，而姚松炎亦唔係因為唔夠時間宣傳而輸，就算真係，現在補選十劃未有一撇喎，點會唔夠時間？
走後門成功 反對派大佬認同
不過，小麗老千走後門成功，反對派大佬都認同佢嗰套喎！民協就再次慘成棄卒，第二度連Plan B都冇得做。馮檢基出過聲，民協主席施德來更話淨係做民調都殺，一樣俾班大佬否決。
民協何啟明被批婆婆媽媽
此前同馮檢基爭過喺立法會出選嘅何啟明，可能以為班大佬當時撐「年輕人出選」，今次都會支持佢，所以就喺接受網媒訪問時講明自己有意參加初選，仲話小麗老千推薦李卓人雖係「善意的舉動」，但「做法不理想」，是放棄了「有爭議但相對進步」的初選：「走回頭路欽點，好可惜囉。......如果無初選，點說服支持者呢？」
佢又認為初選應該有「實體投票」，又批評有人不願賭服輸：「大家一見到Plan B 係基哥，就即刻反枱；所有講過呢啲說話嘅人都係唔願賭服輸的人。」
不過，少年你太年輕了，一涉及實際利益，反對派梗係圍內人行先。「Laurence Woodville」就批評何啟明：「大敵當前，還糾纏於形式......上次姚之落敗，就是人家在你們婆婆媽媽，互相攻擊一團糟時，已起步宣傳啦！」
「Eric Ho」更直指：「西九選民已多年唾棄民協啦！」
不過，「Hung Lee」就講句公道話：「如果由劉小麗決定Plan B人選，這算是民主嗎？」「Eric Chang」也道：「難怪香港民運有退冇進。連搞民主嘅領袖都唔尊重民選機制，咁點會搵人信你會推動到民主呀！」
「Kai Lung Ho」更踢爆反對派大佬嘅如意算盤：「劉小麗唔駛（使）採（睬）你民協，大概係因為今次馬實咗班舊泛民大佬，到選舉時民主黨公民黨職工盟必定會牙血出齊助選。小麗聽舊泛民話，歸佢地（哋）邊，同時舊泛民可以鯨吞民協議員同莊（樁）腳。」■香港文匯報記者 陳川