■區諾軒發帖，指工務小組委員會否決觀塘音樂噴泉及灣仔摩頓臺改建會堂兩項目，形容這是「奇蹟之日」。「自決派」立法會議員區諾軒，經常喺立法會大小會議討論反對派口中「非常重要」的議案時缺席冇投票，俾唔少人鬧爆。可能覺得咁樣唔掂，佢前日就驚死冇人知咁發帖，話工務小組委員會否決咗的觀塘音樂噴泉同灣仔摩頓臺改建會堂兩個項目，仲形容呢個係「奇蹟之日」。當然，佢出帖都係想話畀人聽自己前日有投票啫，有網民就揶揄佢，之前缺席幾次投票都冇公開解釋同道歉過，現在阻咗一個小項目就要話係「奇蹟」，真係佛系議員，「緣份（分）到了奇蹟之日自然出現。」
立法會工務小組委員會上個月通過咗政府申請17億元，喺元朗起天橋嘅建議。當日有5個反對派議員缺席，令建議以16票贊成、13票反對、1票棄權通過，其中一個缺席者係區諾軒，其後俾人揭發佢去咗日本疏乎。
出帖「簽到」驚人唔知
同一個月，民主黨議員林卓廷喺立法會內務委員會提出「就升降機維修保養對市民安全的影響進行辯論」議案，結果又係被否決，缺席者之一亦係區諾軒。
冇嘅，反對派經常將每個議題都吹到係生死存亡之秋咁樣樣，但到投票時就唔見人影，俾人鬧爆自然好正常。
區諾軒一直對批評視而不見、扮低調博人唔記得，但前日工務小組委員會佢有份投票，否決咗觀塘音樂噴泉同灣仔摩頓臺改建會堂兩個項目，佢就即刻慌死無人知咁出帖，形容呢個係「奇蹟之日」喎！
你哋反對派又話「大白象」又話「小白象」，講到咁「不公義」，出席會議同投票係常識吧，咁都可以大鑼大鼓「攞威」？
之前缺席投票仲俾人追緊數
連「人民力量」前主席劉嘉鴻都頂佢唔順，發帖揶揄：「呢個區軒都幾離譜，之前佢缺席投票仲畀（俾）人追緊數，呢頭就懶得意咁話奇蹟之日？」
「藍田社區網絡」社區主任李晉希就用返幾個反對派此前缺席投票時用嘅借口，「內會過唔倒（到）一樣可以響大會提架（㗎）」、「內會過倒（到）咪一樣可以響大會被否決」、「建制派見你多幾個人咪派多幾個人黎（嚟）投反對票囉，你唔係咁天真以為可以贏下（吓）話」嚟揶揄佢。
網民「Zoe Yung」就留言潤區諾軒：「唔係乜嘢奇蹟，根本泛民主派議員就應該喺度開會。唔開一定輸，開會係本份（分）！」
「Horace Leung」恥笑：「一時唔偷雞，即刻做保長。」「Kwun Man Kong」亦話：「有時×都費時（事），不過佢完全冇反省冇自知之明，竟然仲好意思出d（啲）咁嘅post，忍唔住抽吓佢水。」
「CL Man」喺區諾軒fb帖子留言回帶追數：「上次元朗十八億天橋你無去開會有解釋未？係咪去旅行搞到會都唔開？即係有去開會就係政績，唔去開會阻唔到撥款就唔需要向選民交代？」
「Anthony Lam」質問：「原來會有奇蹟，咁點解之前投票起橋你唔見人？」
「Chris Wong」直言：「下（吓），你入去就係為左（咗）阻止依（𠵱）d（啲）濕碎撥款架（㗎）。搵個區議員都搞得掂啦。」
緣分到「奇蹟之日」自然出現
「箂特謝」就寸佢：「不開會、常缺席、外國考察議會邀請優先，緣份（分）到了奇蹟之日自然出現。」 ■香港文匯報記者 陳川
