■同甘共苦？我為份糧啫！ 網上圖片香港文匯報訊（記者 陳川）為咗人工九萬六，反對派可以將原則主張棄之不顧！「瀆誓四丑」之一的劉小麗，昨宣佈加入工黨，並積極考慮以反對派「Plan A」嘅身份，參加今年11月立法會九龍西議席補選。有網民就回帶，指佢曾經話過「希望帶領新的政治文化」，不會加入「小鬥大幫忙的口頭反對派」，現在明顯係為咗高薪而無所不用其極，以今日之我打倒昨日之我，果不愧其「小麗老千」之名。
有傳媒此前報道，工黨已批准「小麗老千」同佢個「小麗民主教室」加入做佢哋嘅團體成員，換言之佢就可以孭住工黨牌頭參加今年11月舉行嘅立法會九龍西議席補選，並可以根據「被DQ者及其組織成員優先」呢個原則，由工黨嘅李卓人自動做「Plan B」，連「初選」都慳返。
劉小麗昨日與傳媒茶敘時，就正式宣佈咗呢個消息。
「神駒」回帶小麗走數當食飯
一直批評小麗老千嘅「無敵神駒」仇思達就發帖，批評佢「為求延續議席，無所不用其極」，「居然加入李卓人所屬的工黨。劉小麗還提倡『自決』嗎？......『捐一半人工』的承諾還會繼續履行嗎？」
佢仲回帶劉小麗在2016年6月28日接受《壹週刊》訪問稱，稱自己「不會參與傳統政黨，只希望帶領新的政治文化，不應該再依賴議員代言人在立法會內，喊兩句口號發言便算，應結集公眾力量一同關心社會。這種只是在議會內投票的舊式政治文化，是時候改變了。」
2016年4月14日，小麗老千又喺《自決論與世代交替的需要》中講過：「傳統的『泛民主派』本來就只是小鬥大幫忙的口頭反對派，在港英護蔭下乘『八九民主思潮』而起，政治路線上以民主回歸論為主軸......」「益友」之一「JoJo Wu」更製圖惡搞小麗老千（見圖）。
政壇變色龍揩嚟揩去
唔少網民狠批小麗老千係變色龍，邊度有利益就去邊。
「MW Cheung」就留言狠批：「雖然政壇都有好多n姓家奴痴（黐）黎（嚟）痴（黐）去，但好似佢之前實牙實齒講接受傳媒話自己唔加入傳統政黨，而（𠵱）家就一個屈尾實（十）就投入工黨懷抱，我登（戥）當日真係睇佢宣傳而投佢票選民唔抵，九萬六見證一個人的面具（目），真係好唔×抵，佢份糧我有份交稅架（㗎）×佢老鼠！」
網民恥笑冇原則者物以類聚
史健仁亦話：「完全唔重視意識形態，思想及主張，能夠幫自己搵到每月月薪連津貼接近三十皮，唔開會唔投票都唔會比（俾）人鬧嘅荀（筍）工，就老竇老母都可以亂認。明明係『自決派』（空洞無物嘅名詞），卻走入社會主義嘅工黨。究竟妳係追求全球工人大團結，定係為幾百萬香港人自決前途而戰？」
「Bill Cheng」揶揄：「何秀蘭入得工黨早就代表工黨無咩立場。」
「Milk Tea」亦話：「為左（咗）九萬六，牠（她）是不會為自己無底線而感到羞恥的。而且小麗老千始終如一，貫徹老千性格。邊度有着數就去痴（黐）。」
佢仲揶揄：「會唔（會）係因為『自決派』的小麗老千入左（咗）工黨，政府將成個工黨定性為『自決派』啦！」
華生：「泛民」私相授受小圈子
「Joseph Li」就狠批：「『泛民』搞的民主是甚（什）麽? 係私相授受、係欽點、係小圈子遊戲。『泛民民主』=扮民主，肉酸到嘔，核突到暈。」
「Endrew Cheung E」就關心另一樣嘢，就係小麗老千聲稱當選後會每個月捐一半議員人工，喺九龍西成立服務長者嘅義工隊，但結果只捐咗兩個月，義工隊亦無影。
他揶揄：「（小麗老千）會唔會咁講呢？『我已經加入工黨，以前的選舉口號已不存在，所以無需再捐款，大家向前看。』」