鰂魚涌公園開槍命案發生後，警方出動了反恐特勤隊跟進，民主黨的太古城區議員趙家賢昨晨稱，他對警方此舉「有保留」，令市民「擔憂」。
此言一出，網上恥笑以至批評不絕。批評趙家賢事後孔明，一旦有無辜市民被槍擊佢到時又會話政府準備不足，有啲咁嘅議員，先至最令市民擔憂。由於劣評如潮，佢最終搵到個下台階，收回呢一番言論，但就話係報道佢呢番話嘅傳媒扭曲佢意思。網民當然唔放過佢，質疑佢前言不對後語，係因為見到民意而轉向，不愧係騎牆政棍。
事後孔明博出位 枉為滅罪委
身為當區區議員嘅趙家賢，在槍擊案發生翌日上晝接受電台訪問，《明報》嘅網上新聞竟引述佢話，佢對警方出動反恐特勤隊處理是次槍擊案「有保留」，更質疑「是否有需要」，「去到的警察都知道槍手被制服，場面穩定了......（出動反恐特勤隊）啲人會否好擔心是否有人拿着AK-47。知多少少的市民，見到傳媒畫面，會引起多少少擔憂。」
唔少網民都批評趙家賢事後孔明，抽水博出位。不少人都話槍擊屬於極嚴重案件，加上發生時無人能確認是否恐怖襲擊，警方嚴陣以待作最高戒備是必然的，怕有市民「擔憂」，不如叫食環署甚至佢自己落去應付啦，仲恥笑佢個腦部構造係咪異於常人（見表），佢喺回應時就話人哋係「網上藍絲」，引發罵戰（見另稿）。
搞咗成日，身為東區撲滅罪行委員會委員的趙家賢出席東區撲滅罪行委員會。佢發帖話，東區警區指揮官會上解釋，在案發時，警方收到20多個報案內容，情報上反映當時有眾多不同變數，警方為保市民安全，決定採取高度戒備，而當時反恐特勤隊剛巧鄰近事發地點，遂成為首批到達現場的警力。
膠成日先知衰 言論前後矛盾
終於搵到下台階嘞，趙家賢話要收回喺電台嘅講法，並認同警方當時派出反恐特勤隊的安排，「同時繼續高度評價警方在是次案件的處理及調查工作，期待警方盡快查出非法槍支來源，保障市民安全。」
佢又聲稱，自己喺商台的直播訪問中，「從未曾使用『質疑』字眼，該字為某報館記者自行使用，特此澄清！」其後，他在留言中就講明「某報」即係《明報》嘅網上新聞，仲話對方「將我個意思扭曲，加鹽加醋，衣（𠵱）下（吓）嘢我表示無奈。」
所謂「覆水難收」，唔少網民都唔接受佢解釋。「Shun Hui」就話趙家賢之前網上同人罵戰時，根本冇提過呢樣嘢：「您頭先唔係咁講㗎wor（喎），無講係報社自行加上質疑兩個字wor（喎）。」「Donald Li」揶揄：「今（前）早是發自內心，晚上就口不對心，政棍本色！」
網民怒斥騎牆政棍不該
「Chris Yeung」就一語道破：「睇完民意就轉風向。」「陳燕輝」附和道：「好多議員都係騎牆派份（分）子於己不利者馬上轉軚。強項。」
「Dick Yu」則道：「有警察趕去罪案現場，無論甚麼編制，階級，甚至係休班，都合情合理，都唔知有甚麼問題？有甚麼好質疑/疑惑......嘩（譁）眾取寵，不知所謂！」 ■香港文匯報記者 陳川