反對派經常大搞暴力衝擊，自然對維護治安嘅警察懷恨在心啦，民主黨區議員趙家賢喺太古城搶擊案中嘅表現，並唔係個別事件囉！公民黨立法會議員陳淑莊，就對警隊招募廣告中有警員話係因為「窮我一身使命感」而加入警隊「好有意見」，仲話「聽完你唔打冷震唔起雞皮當我輸」喎，真係仇警仇到上腦。
唔知係咪港島區治安好，所以呢區啲反對派議員零舍仇警。話說網絡此前瘋傳一條片，片中訪問一位喺暴雨下開工嘅地盤工友，係因為愛定責任，呢位地盤工友就爆粗：「係窮呀，××××！」警方近日招募警員，就仿呢條片拍咗套宣傳片，內容係一名警員被問及點解加入警隊，「究竟係咩驅使你喺暴雨下工作，係愛吖定係責任感呀？」呢名警員就答：「係窮呀--窮我一身使命感同服務社會！」
身為港島區立法會議員嘅陳淑莊，就分享咗呢單新聞，仲話「聽完你唔打冷震唔起雞皮當我輸」。佢班支持者，更喺留言時肆意侮辱前線警員。「Joe Wong」稱：「乜野（嘢）原因做差佬？夠×街~囉~」 「Sam Fong」聲言：「黑警福利甘（咁）好，非禮，挪用擔保錢自用，公務（器）私用，坐監有錢收，無籍（藉）口唔投考香港公安。」
睇吓班陳淑莊支持者嘅留言，已經反映咗陳淑莊係咩人啦！查實，唔係靠你班黃絲口中嘅「黑警」，香港點可能成為全球最安全嘅城市？反對派無時無刻不針對警隊，就連搞吓貼地啲嘅宣傳就無限上綱，真係希望你班人成世人順風順水，冇咩頭暈身慶（㷫），否則到時竟然要「黑警」幫手，就真係情何以堪囉！■香港文匯報記者 陳川