唔好以為趙家賢屬於「民主黨」，兼任「民主動力」召集人就真係好民主喎，趙家賢喺fb留言回應網民批評時，就搞「二分法」，話批評佢嘅係「網上藍絲」。不過，佢黨友油尖旺社區主任李偉峰，都發帖抽佢水，話同黨嘅立法會議員涂謹申「講法比較正路」，哦，唔通民主黨內都有「藍絲」？
趙家賢俾人鬧爆時留言回應，第一句就話所有批評佢嘅人都係「網上藍絲」，仲話自己「一向同警方有好良好既（嘅）溝通」，自己在接受傳媒訪問時「只係對警務安排上既（嘅）一些分歧睇法」，「點樣真正支持警方政治中立而又公正執行職務，本人相信小弟比你地（哋）班藍絲更為熟悉......」
同黨轉元老言論 摑臉啪啪響
查實唔少留言批評佢嘅人係「黃絲」嚟嗰噃。佢同黨李偉峰，就喺聽完�嘅「偉論」之後發帖，上載涂謹申就槍擊案見記者時嘅新聞，仲話「太古城槍擊案......都係SHARE涂謹申講法比較正路」。
佢又喺帖子嘅標註話「個人認為出動反恐特勤隊好正路」、「港島區擺街又最重火力的隊伍」、「無咩做都會落地鐵站巡更」等，摑趙家賢一大巴。
網民「Shun Hui」亦留言鬧爆趙家賢：「咩藍絲黃絲？『佔中』我有去撐學生，係道理就係道理，枉您自稱博士。今次無傷及無辜，您就覺得警方過份（分）緊張，如果好不幸有（傷及）無辜，警方無以高裝備嘅特別部隊處理，您會咩（點）發表？言論講到自己高人一等，您又知呢度留言無人比您更清楚警隊職務？」
網民狂片「搞篩選」遭滅聲
「Sun Cheuk」亦話：「同你意見不同就藍絲？你講咩民主？咩言論自由？係咪民主黨買左（咗）專利，得你用得？」「Vincent Lam」嘆道：「啲泛民成日話人地（哋）乜都賴落『佔中』度，但係自己咪又係成日凡事都分清藍絲定黃絲，總之唔認同就係五毛，真係無言。」
「Shuk Man Edith Yu」批評：「 Wow！唔啱聽就自動轉賬到藍絲賬戶，議員要篩選市民顏色至會服務嗎？」「Sunny Wai」亦話：「唔好反對你嘅就藍絲，支持你就黃絲......警方今次迅速處理，理應支持及鼓勵，唔係雞蛋裡挑骨頭，請你唔好自動上腦~」
唔單止咁，有批評佢嘅網民更投訴俾佢block咗冇得留言。「司徒法包」就話：「你樂意同警方溝通，咁點解要block啲市民唔比（畀）留言呢？怕乜呀你？」「Sun Cheuk」揶揄：「言論自由係佢地（哋）專利，得佢講。民主定義係我地（哋）係市民，佢係主。」■香港文匯報記者 陳川