北漂13年 為家庭回流很開心
誰說做星二代有着數？像狄龍兒子譚俊彥（Shaun）在娛樂圈發展十多年，一直沒有靠父蔭，自己默默工作。最近才憑古裝新劇《天命》而讓香港人熟悉。譚俊彥在內地發展超過十年，3年前為了女兒出世，令女兒有更好的成長環境，寧願放棄賺人民幣，正式留港發展。 採訪、攝影：植毅儀
古裝新劇《天命》找來譚俊彥做嘉慶帝，對於這個新面孔，香港觀眾對其演技褒貶不一。談到網民的評論，Shaun自言自知不足，會接受大家的意見。兩年前首度簽約無綫拍劇做「親生仔」，處男作《天命》已播出，緊接下一個檔期的《特技人》又是他做男一，還沒計已拍畢的《包青天再起風雲》。連記者都忍不住讚他機會多，好多在TVB捱了十年的「親生仔」都未必有此機會。
「觀眾對我在《天命》的演技有讚有彈，有些人覺得我演得誇張，我條眉一用力就會好猙獰。觀眾意見我有睇，也會聽。太太（任祉妍）也是演員，也會畀意見我。拍《天命》中飾演嘉慶帝，其實好戲要做。你要明白，當時的嘉慶帝做了四年廢帝，又面對和珅呢個大貪官，所以佢內心好壓抑，好想證明自己係做到嘢，演繹嘉慶帝嗰種壓抑的感情戲係最難。但係展鵬（陳展鵬）演的和珅真係一個好好的對手，展鵬好有做好電視圈、為電視圈出力的那團火。」
陪伴家人放第一位
無綫小生花旦紛紛離巢，不少更是北上拍劇或參與綜藝節目，不過亦有人放棄北漂回流香港，說的是狄龍兒子譚俊彥，38歲的他在內地發展13年後回流香港，加入TVB兩年。當初回流香港，為的是陪當時剛出世的女兒譚晴成長，更沒拍劇近一年。去年兒子譚杺出世，Shaun劇接劇忙爆，現在回想起，Shaun都覺得少了時間陪家人。
「大女出世，我停咗工近十個月去陪伴佢成長，所以個女好黐我，現在如果我返特早班，我放工時就會煮早餐畀屋企人食，因為個女由細到大都食我煮嘅嘢。送女兒上學，等個女食完去返學，我就去瞓覺。在TVB人工係未必比在內地人工好，但我養得起兩個細路就OK。而且我有做電影配音，也是我的收入來源之一。反而是兒子出世期間，我忙於拍《特技人》，當時公公唔舒服，入咗醫院，我要照顧佢，同時我太太又就嚟生。記得兒子出世，我早上收電話趕去醫院睇個仔，下午即收到另一個電話話公公去咗。當時完全唔敢話畀太太知，怕佢接受不來。回到TVB廠，大家仲恭喜我生咗個仔，當時我都唔知畀咩反應好。你以為這些情節只出現在戲劇世界，但又確實在現實中發生緊。」
做人「三觀」要正
21歲開始涉足熒屏，爸爸起初反對得很，但由於外婆、外公、媽媽都贊成，作為父親的狄龍也只好默許兒子演戲。譚俊彥出道後，自2000年加入爾冬陞旗下入行，拍過梅艷芳主演的《慌心假期》，之後亦拍過《男人四十》、《少年阿虎》等電影。03年譚俊彥轉戰內地，拍林峯主演的古裝劇《陸小鳳與花滿樓》，飾演劍癡西門吹雪而為內地人熟悉。身為「狄龍個仔」，Shaun自言沒有着數，這麼多年都是靠自己在這行打拚。
「大家畀面就叫聲爸爸做『狄龍大哥』，但唔會因為爸爸的關係而畀工作、角色我，我要靠自己，沒任何着數。不過從小爸爸教我做人『三觀』（人生觀、世界觀、價值觀）要正，所以一些太負面的角色我都唔會接。回來香港發展後，同爸爸媽媽的關係比以往親密了。個女3歲，哄得爺爺、奶奶好開心，不時去接佢放學，天倫樂。但有時我都被佢哋激死，去湊孫好多時畀糖佢食，知道我唔鍾意，仲教我個女唔好同我講食咗糖。太太現在以照顧小朋友為主，暫時沒打算復出拍戲。以前經歷過豪買豪用的日子，現在一家人夠食、夠住，開開心心就得。」