■傻根一面咒罵被困少年，一面又幫佢哋祈福。 fb截圖「畀啲首飾我，我幫你全家祈福吖！」呢句台詞真係老土到騙徒都唔敢用，但自覺係「天命之子」嘅 「城邦派國師」傻根（陳云根），明明早幾日仲話班泰國被困嘅足球少年係「造孽」，應該要「拒絕再被人拯救」，但之後又話要幫佢哋「開壇作法」，叫大家「贊助」咁話。咁都諗到可以籌款，真係同路人都睇唔過眼。「城邦大將軍」「藍鳳凰」日前就出文大鬧傻根嘅法會掠水神功根本係「祈福黨神棍騙術」，目的都係呃錢。
一班網民就食晒花生，一箭雙鵰咁話「家陣先至知條神棍係智障」，再大笑佢哋「狗咬狗」。
「叨光」救少足 「藍鳳凰」炮轟
泰國被困洞穴嘅足球青年日前已全數獲救，傻根再一次覺得係因為自己搞「深夜佛堂」有「功勞」喎。佢喺救人行動開始前就「開壇作法」，之後就不斷更新有人被救嘅消息，好似真係有「神」聽到佢嘅「祈福」咁。
個「神蹟」偉大到咁，連傻根嘅人都過唔到自己嗰關。「藍鳳凰」日前就叛變，以「佛門警訊」為題玩踢爆，指出傻根之前就話班「傻仔」造孽，應該「拒絕再被人拯救」，「到今日（7月7日），見美國太空探索技術公司SpaceX同Tesla行政總裁Elon Musk出手相助，覺得勝算大，有光可沾，於是又話自己會開壇作法，等到救到個（嗰）時就可以話自己作法有用有功勞。」「藍鳳凰」批評，傻根呢啲叫「祈福黨神棍騙術」，以玄學道術為名，實際騙取金錢之用。
「藍鳳凰」自己都好似做「見證」咁話：「你冇睇錯，呢個係以往受同道敬重嘅陳雲，依（??）家為呃香油錢，變成『中國式祈福黨』。而真係信佢法力無邊嘅，其實同上次旺角賣身葬父中招科水嘅智障一樣水平，呢啲低智人口適合留響熱城陣營。」疑似係傻根前「信徒」嘅「奇妙棠菜」亦留言話︰「陳雲已經淪落至此，為生計而做神棍，親手搞臭華夏之名。」
網友寸反骨 「神駒」食花生
咁樣派花生法，恥笑開「熱青城」嘅「神駒」仇思達就進一步將佢發揚光大，成班益友都留言食花生。「陳永仁」揶揄：「呢件藍鳳凰同何志光一樣反骨成性。而（𠵱）家狗咬狗骨抵×死。」
「Bianca Silva Guterres」就話一早睇透傻根本質，「家陣先至知條神棍係智障？佢第一次在面書公開講『啟稟玉帝』時，我就已經覺得係唔對路。」■香港文匯報記者 何西