嗱，明明籌款標語就借劉曉波過橋，之後仲話會轉贈劉霞噃！遊行，籌錢；俾人DQ，籌錢；有人坐監，籌錢；「聲援」劉霞，都係籌錢。唔係拍緊廣告，而係「籌錢」兩隻字真係反對派嘅萬能key啫。之但係，出得嚟行，預咗要還。劉曉波遺孀劉霞近日去咗外國，唔少網民就關心社民連長毛（梁國雄）之前用劉霞名義籌嘅錢，到底有冇畀到劉霞。不過，長毛眼都唔眨就話自己「冇話過幫劉霞籌款」，即刻俾人摷返佢之前籌款實況啲相出嚟。不過算啦，乜大家仲對反對派籌款有信心或期望㗎咩？
劉霞最近順利出國，成班冇血緣關係又成日將劉霞掛喺口邊炒作嘅反對派政客頓失依靠，難為佢哋今日仲要就住劉氏夫婦而搞集會，但影響最深嘅應該都係以「毋忘劉曉波，釋放劉霞」嚟籌款嘅長毛。
已經唔知再有咩名堂籌款嘅長毛，仲要俾網民追問籌款去向，想知啲錢到底有冇得幫補劉霞。喂阿哥，佢當日只係想籌款啫，冇諗過劉霞用得着㗎嘛，但長毛都算淡定，一句解決大家疑問，聲稱自己「冇話過幫劉霞籌款」。
神駒回帶「罪證」 長毛龜縮深潛
咁事實又係點呢？神駒仇思達二話不說就貼咗張相，相中嘅長毛背後大大隻字寫住「馬上釋放劉霞」，旁邊亦有兩個大大個嘅籌款箱喺度，咁都話無關，只可以話平時捐款嘅市民真係會錯意，籌款箱原來只係擺設。
香港文匯報讀者、追擊開長毛嘅「JoJo Wu」就繼續追擊，貼另一張長毛籌款照出嚟。呢張相入面嘅長毛就實在啲，坦白咁講叫大家捐款去「贊助劉曉波像雕塑費」，傳說呢個雕塑仲要用成17萬咁多，「JoJo Wu」就狠批︰「生勾勾嘅人你地（哋）唔去幫，而走去消費死人整雕塑呢啲『大白象工程』叫人贊助。仲要只係將收集到嘅簽名同畫轉贈劉霞，咁啲錢呢？真係用嚟『贊助劉曉波像雕塑費』？定自己袋曬（晒）落袋咋？」
唔少網民都留言揶揄長毛咁樣「乞錢」。「Carlos Cheong」話︰「呢啲咪就係真正嘅人血饅頭囉！」「Alex Lo」模擬劉曉波心聲話︰「我洗（使）×你梁國雄社民連幫我整雕像！」有網民就非常警世咁話︰「這幫政棍從來沒有真為劉霞籌款，係劉霞幫佢哋籌款。」
成日同網民對罵嘅長毛，喺今次呢件事上終於收咗聲，俾人tag（標籤）極都冇回應，睇嚟班網民都應該好失望嘞。 ■香港文匯報記者 甘瑜