■陸頌雄提醒大家出外旅遊時應尊重當地規矩。fb截圖「你估×人老母唔使付出代價呀？」呢句電影對白，估唔到喺現實中真係發生！有個港男舊年6月去台灣觀光，見到有警察抄載佢嘅的士司機牌，竟然用廣東話「問候」人哋媽媽。最抵死嘅係，個台灣警察原來聽得明，當場拉咗吽C個港男日前仲被起訴「侮辱公務員公署罪」𠻹。唔少網民都大讚台灣方面做得好，希望香港都有類似法例去保障返執法人員。
事件中個港男據悉係39歲嘅王姓男子，舊年去台灣觀光時包的士出入，點知個司機因為違泊俾警察抄牌。正當警察開緊牛肉乾嗰陣，港男突然爆seed用廣東話講咗句「×你老母」，點知個台警即場喝令佢下車，話他觸犯妨害公務罪，要逮捕佢。
所謂「講就兇狠」，個港男知道瀨嘢，即刻沙冧，仲話：「我在說廣東話，又沒有在罵你！」該名台警即時回應：「這句香港髒話，台灣人都聽得懂！」隨後將他上銬帶回偵辦，將港男留置拘留所一晚，隔天送基隆地檢署複訊。
檢察官複訊後認定王涉犯侮辱公務員公署罪與公然侮辱罪嫌，處分王一萬元交保，並在調查後認定，該港男同時觸犯侮辱公務員公署罪與公然侮辱罪，依刑度較重的侮辱公務員公署罪嫌起訴。
唔少港仔一定會講，講粗口啫，犯法呀？就係犯法！根據台灣刑法第一百四十條，「於公務員依法執行職務時，當場侮辱，或對於其依法執行之職務公然侮辱者，處六月以下有期徒刑、拘役或一百元以下罰金。」
網民譏以「言論自由」當令箭
咁樣丟香港人架，唔少網民都恥笑呢個落網男子。有台灣網民就話，佢哋自小就睇電影，特別係周星馳嗰啲，廣東話粗口簡直係「集體回憶」，台灣警察當然聽得懂啦。香港網民「東方紅」話：「呢啲真係冇事搵事做，又唔係抄牌罰你，咁多事做乜？」「Duncan Fuk」批評：「真失禮！井底蛙係（喺）台灣用廣東話講××××，你估人地（哋）真係唔識聽，三個字低×能！」
「Ray Kwok」就道：「呢鋪仇警垃圾×出國際啦∼」「Francisco Siu」聯想到：「好彩係台灣，如果發生喺香港又話警權過大了。」「Lisa Won」附和道：「喺（係）囉！跟着泛民議員又湧出來罵警察不對了！」「LI Edmond」揶揄︰「呢啲咪『言論自由』囉，......點解啲人又唔講台灣『打壓言論自由』呢？香港的井底蛙。」
陸頌雄：外遊應守當地規矩
工聯會立法會議員陸頌雄都有關心件事，喺facebook提醒香港市民去旅遊嗰陣應該「遵守當地規矩和習俗，避免為人哋、為自己帶來麻煩」，叫大家將最好嘅一面展示畀人哋睇。佢仲話，「唔係度度警察都好似香港警察咁客氣，特別喺美國，夠膽挑釁警察或者有任何小動作，輕則坐監重則冇命。」
網民撐港立辱警罪
唔少網民都深有同感，又覺得台灣方面做得好，希望香港都立返條辱警罪。「Fung Chu」話︰「公職人員，一定要有威嚴，不然無法執法。」「Coffee AIfa」表示︰「一定支持辱警罪！」「Yat Hang Wong」補充︰「不止辱警，應包括公職人員，才是。」相信如果真係立咗法，啲激進派、「勇武派」加埋「港獨派」，真係塞爆監倉都似。■香港文匯報記者 何西