■林欣彤幾乎全程靠打字與歌迷溝通。香港文匯報訊 林欣彤（Mag）向來疼惜歌迷，今年她忍着聲帶勞損之苦，與「彤伴」舉行一年一度的聚會；更因要養聲準備年尾舉行的演唱會，幾乎全程靠電腦打字與歌迷溝通。席間，Mag看畢歌迷準備的回憶片段後，數度哭成淚人。
Mag甫上台即以沙啞的聲音向彤伴打招呼，並坦承聲帶出現勞損情況：「但係唔緊要，我一定會克服嘅。其實我聲帶勞損已經有一段時間，我依然死忍，但我現在覺得我要照顧好自己先，先至可以有更好嘅表演畀你哋睇，我唔會辜負你哋等咗咁耐嘅呢個演唱會。」說畢，Mag即宣佈其音樂作品《忍》，網上點擊率已突破200萬。之後，Mag即乖乖地遵守諾言，全程以打字形式與歌迷溝通，除感激特意抽空前來的歌迷及為是次活動出心出力的歌迷會幹事們外，更笑住問歌迷「肚唔肚餓」。
歌迷支持捱過難關
雖然備受聲帶勞損情況困擾，但Mag與歌迷們玩遊戲時仍投入非常，全程七情上面兼即時做出捧腹表情。不過當歌迷們呈上回憶片段時，Mag一度哭得要用紙巾捂臉。她事後亦邊嗚咽邊在台上感謝歌迷們多年來對自己不離不棄：「舊年演出舞台劇時，我已經發現聲帶有啲勞損，但我選擇咗唔理會，每場都盡力去唱去做，跟住之後所有嘅演出同做歌，每一個工作我都係盡晒力去做，因為我知每一次你哋（歌迷 ）都喺度，所以我好想全力去做。」
她續說：「現在做音樂好難，如果我休息得太多，或者偷咗懶，我驚我會辜負咗你哋，所以我就冇理自己一直咁衝。我其實覺得你哋可以有好多理由唔記得我，但你哋冇，所以雖然好多困難都好大，但大唔過你哋對我嘅愛，所以我咩都唔怕，我會喊我會攰我會驚，但我會好努力去照顧好自己，之後我會更有智慧去行我嘅路，唔會再死衝爛衝。我真係好多謝你哋，我唔知點表達對你哋嘅感激。」
當談到今年的生日願望時，Mag繼續感性說：「好感恩我哋一直喺互相嘅低谷陪住大家，咁樣堅持到係好難；我哋嘅人生定必會遇到好多困難，但唔緊要，我哋有彼此、同埋我哋有愛。呢個係我最大嘅願望，無論任何事，我哋都係支持住對方嘅。」