■見前助理開店，顏汶羽趕來捧場。好多議員為咗處理地區同社會事務，都會請助理嚟幫手，咁做完助理又有咩出路呢？青年民建聯主席顏汶羽噚日喺facebook度出post，話原來自己第二個助理靜靜雞創業，喺尖沙咀開咗間賣外賣奶茶舖。
佢仲回顧下自己前同事嘅去向，裡面大大話話有3個自己創業、一個去咗非牟利機構做中心主任、兩個入咗政府，笑言自己「助青年向上流」咁話。
顏汶羽作為前老細都算唔話得，前助理創業開飲品店，即刻出圖出文支持。佢話，間舖頭賣嘅係自己最鍾意嘅港式奶茶，唔知係咪嗰時自己飲得太多，搞到前助理對奶茶忽然咁有研究。
顏汶羽又大讚前助理好學、勤力，對自己好有要求，好有諗法，見到佢𠵱家自己創業，都有點安慰咁。見到顏辦變咗少林寺，佢就話好開心大家可以練好武功，為自己嘅理想打好基礎，追尋自己嘅夢。 ■香港文匯報記者 鄭治祖