■不少網友都在fb上恥笑陳浩天「衝出國際」。 fb截圖究竟有咩動力，驅使班外國傳媒去報導陳浩天呀？梗係佢夠傻夠天真啦！話說美國《時代雜誌》（Time）近日同陳浩天做訪問，成堆「獨派」見到陳浩天上國際雜誌，就圍爐取暖話佢名氣衝出國際，點知睇真啲內容，原來成篇報道都係瘋狂恥笑陳浩天，話佢根本冇諗過「港獨」之後可以點，前日喺香港外國記者會（FCC）嘅演講又缺乏具體細節，回應問題時離題又迴避。咁樣上國際雜誌法，真係不得不講一句「我真係恭喜你呀！」
《時代雜誌》前日採訪陳浩天，內容雖然都有提下佢「播」獨嘅嘢，但字裡行間都充滿住記者對陳浩天嘅唔耐煩。篇報道話陳浩天以一個支持「獨立」嘅政黨領導人嚟講係「怪異」，又質疑佢對黨員做出奇怪指示，例如佢唔親自見班黨友，而係寧願網上召集，反而仲會留低所有犯罪踪跡。
報道仲寸陳浩天訪問當日着到西裝友咁，但事實上只係做吓散工嘅無業漢，狠批佢喺兩個鐘嘅訪問入面，講唔到點樣實現「港獨」、講唔到「港獨」後嘅願景、講唔到有咩「國際盟友」、講唔到邊個去管治香港等等，反而講返大學去做交換生就神彩飛揚。九唔搭八嘅程度同陳浩天喺FCC嘅演講一樣，都係冇細節、離題或避答問題。
獨人FF被恥笑：睇英文內文啦！
隻隻字好似一巴兩巴咁打腫陳浩天塊面，一眾網友梗係都加入恥笑行列啦。facebook專頁「剷爆左膠」就勸班造神反對派睇清楚內文：「偽獨打飛機話陳浩天上了《Time》衝出了國際。識唔識英文睇下內文呀？篇文寸佢口講獨立但無內容，覺得呢條友有古怪呀！不是他衝出國際，係你地（哋）衝出黎（嚟）×！」
「Audrey Tang」直言︰「好坦白咁講，如果陳浩天唔係由於『港獨』立場而成為新聞人物，我唔認為佢有咁嘅斤兩去外國記者會演講。」「Alvin Wong」就覺得陳浩天講嘅嘢根本唔實際：「其實陳浩天演說所講的『香港獨立』，很空泛，而且事實上根本很難實行。」 ■香港文匯報記者 何西