■「芒向報」質疑鍾劍華。 fb截圖理工大學應用社會科學系助理教授鍾劍華早前撰文，涉嫌將前特首梁振英（CY）描繪成「黑社會成員」，俾CY入稟告佢誹謗，而初頭講到明係幫「瀆誓四丑」打官司、後尾話要幫「佔中九男女」嘅「守護公義基金」，又轉受益人啦，打晒開口牌話要「眾籌打官司」嘅鍾劍華順理成章自動當選。有網民就不滿主流反對派特別係公民黨，既然覺得成件事咁唔公義，又咁多大狀喺手，點解唔派返一兩個義務幫鍾劍華打官司，反而要喺「守護公義基金」度抽啲民脂民膏左手過右手。佢哋又質疑由民主黨牽頭、同鍾劍華槍口一致嘅「天下為公」眾籌計劃，點解唔落水幫對方，反而要益班外國律師甚至「自肥」。
■香港文匯報記者 陳庭佳
喺「守護公義基金」宣佈幫鍾劍華當日，曾經以打倒又稱「芒果佬」嘅黃毓民為「使命」嘅facebook專頁「芒向報」勞氣到不得了，佢哋個網台主持「義德臺仰」叫鍾劍華「自己官司自己打」，因為對方話晒係教授，人工一定唔少：「你鍾劍華，自己衰口多多，亂咁寫嘢，??家舐（瀨）咗嘢，你個乜嘢基金就跳出來叫人捐錢，去幫鍾劍華打官司？你冇嘢吓話？」
網民：噏「公義」又係吸資
「芒向報」前日再發功，「義德臺仰」 問鍾劍華點解唔叫啲律師朋友義助， 唔叫佢哋一齊守護公義，「點解無個『泛民』律師義助？根本係『守護公義雞棚』！」都係主持嘅「許留山」跟住接力，仲拉埋公民黨落水：「鍾教授在流血，大狀黨在哪裡？」
主理佢哋另一個節目嘅「Tony Choi」就認為，呢單嘢又幫法律界「創造就業機會」，如果主流反對派班大狀唔肯幫鍾劍華免費打官司，一係就唔當佢朋友，一係就唔當佢係「義人」，到頭嚟所謂「守護公義」原來係叫市民科水。
反對派籌旗手法好似啲騙徒一樣層出不窮，除咗「守護公義基金」，另一檔出名啲嘅叫做「天下為公」，聲稱要籌旗「調查」CY收取澳洲公司UGL折合5,000萬港紙。
「Tony Choi」質疑「天下為公」同鍾劍華槍口一致，點解唔出錢幫佢，除非筆錢淨係支援民主黨，或者覺得鍾劍華呢啲「抗爭」唔算得上乜嘢，又或者民主黨同鍾劍華喺爭取小市民捐款方面係競爭對手。
「天下為公」數簿唔清唔楚
「義德臺仰」就摷埋人哋本數簿出嚟，話「天下為公」喺6月交代過盤數，當時一共籌得223萬蚊，其中10.4萬蚊用喺行政費，「請一個full-time（全職）打雜都算差唔多，不過其實有幾多工作呢」，另外喺海外聘請律師使咗15萬蚊，但細節唔清唔楚。
至於「公關及影片製作」嗰13.5萬蚊更加係冤枉，「大家睇吓套片，黑麻麻，幾個人獨白，剪埋一齊就13.5萬，分分鐘我搵部iPhone都拍得好過佢。」
「黃絲」玻璃心瘋狂洗版
阻人發達猶如殺人父母，「芒向報」班人咁樣踢爆主流反對派，仲唔俾班「黃絲」圍剿咩，一時間「破壞團結」呀、「鬼」呀、「變節」呀呢啲鬧人關鍵詞充斥住成個專頁。
「Tony Choi」無咁好氣：「原來打住『泛民』旗號，就可以收錢而沒有交待（代）！」「黃活志」玩曲線但無講明：「不要問，只要信，有質疑，清算你！」