■「河童」將所有少年犯都當做學生，不過有啲人已經讀緊社會大學。fb截圖「中箭」（「香港眾志」）秘書長河童（黃之鋒）噚日郵差上身，幫人轉寄畀一啲所謂「政治犯」、包括帶氣槍出席集會被斷正嘅「港獨」分子劉康嘅信，仲聲稱有幾個本來應該開咗學嘅??仔，因為「政治案件」而喺入面踎緊，但就唔知當中有人一早已經投身社會。有人就覺得「中箭」嘥鬼氣，因為班友入冊係自己攞嚟嘅，又有口痕友講笑話，好彩唔係出名錯字多過乜嘅河童寫信畀佢哋，如果唔係收到都唔知好嬲定好笑。
為咗撐「獨」，河童喺fb發帖，提咗3個未夠21歲、因為「旺暴」而入冊嘅少年犯，包括麥子晞、莫嘉濤和葉梓豐，話新學年開始，佢哋3個「本應可以選擇在學」，但因為「政治案件」而喺入面踎緊。
不過，根據法庭資料，莫嘉濤犯案嗰陣已經係侍應，葉梓豐當時就報稱係冷氣技工，只有麥子晞係學生，河童咁樣幫佢哋戴學生呢個「光環」，似乎牽強啲喎！
佢仲特別提到帶氣槍出席集會被斷正、讀緊中六嘅「港獨」分子劉康，話對方將會喺今個月12日面對判刑，??家還柙緊喎。
帶氣槍出街 「無人屈佢㗎」
網民「Lap Sun Ho」就唔係咁諗：「咪×玩喇，政治犯？條傻仔帶汽（氣）槍出街，自己話係用嚟自衛㗎，無人屈佢㗎，要怪就怪佢自己太過誠實喇。」
「Shui Chun Chee」覺得應該要畀嗰啲所謂「政治犯」靜思己過，唔使寄信畀佢哋：「有書唔讀出嚟搞（攪）屎棍，自己選擇浪費晒啲青春就賴晒法官同政策迫害你，從來都唔識為自己的人生負責任同檢討吓。」
有口痕友就覺得，好彩河童係寄信嗰個，唔係寫信嗰個，唔係實激到班「政治犯」撼頭又好、吊頸又好！
點解咁講？皆因河童入冊嘅時候，曾經畫過幅「監房平面圖」，喺嗰短短30字標示中，竟然有5隻錯字咁多，平均寫6字錯1字，包括係「廁所」寫錯做「次所」、「洗手盆」寫錯做「洗手盤」、「硬板床」寫錯做「硬版床」、「儲物箱」寫錯做「儲物廂」，仲有個寫到難以辨認嘅「平面圖」個「圖」字。■香港文匯報記者 陳庭佳
