■旅行社介紹長毛為「隨團專家」喎。 網上截圖被DQ後冇咗立法會議員份人工，劉霞去咗德國後連借啲意叫人捐錢嘅口號都冇埋，社民連長毛（梁國雄）終於決定要腳踏實地咁做人，扮專家帶人去遊古巴，15天行程每人收六萬二千八。雖然旅行社好似覺得長毛「經常穿著（着）印有共產主義革命家哲古華拉頭像的襯衫」都係長毛嘅「噱頭」之一，但有網民就揶揄長毛「食埋哲古華拉嘅人血饅頭」，仲有人恥笑佢︰「『哲墮華拉』帶你遊古巴。」 ■香港文匯報記者 甘瑜
公民黨今年5月話要慶祝成立12周年特意籌備，所以喺今年暑假隆重推出所謂「逆權旅行團」，由公民黨主席梁家傑、黨魁楊岳橋同油尖旺區議員余德寶帶隊，去韓國「探索光州事件事發現場」，「跟著（着）『逆權電影系列』追尋逆權足跡」，去「親歷逆權場景」喎，其間會住高級酒店、歎鮑魚同人參雞，所以每位盛惠23,800蚊。
不過，食人血饅頭嘅嘢，邊個夠「長毛」梁國雄嚟吖！有一間主打深度遊嘅旅行社近日開咗個團，話年底帶人遊古巴，「聯同隨團專家長毛，一同踏進這共產革命者的天堂」咁話。
扮專家隨團 盛惠$62800
該旅行社形容長毛係「古巴共產革命史專家」。不過，睇睇個介紹：「經常穿著（着）印有共產主義革命家哲古華拉頭像的襯衫，並於多個場合公開表明自己馬克思主義者的身份。」嘩，乜咁樣就可以叫做係「專家」？睇嚟得閒着住件哲古華拉T恤都真係呃到吓人。
呢個團行程15天，每位盛惠62,800蚊，抵唔抵就真係見仁見智啦。
被質疑變相無牌帶團
好多人驚訝於長毛咁都可以搵到人血饅頭食。「Cannas Yu」鄙視道︰「好心長毛唔好成日抽哲古華垃（拉）水啦！」「Dikko Fong」質問︰「著（着）件哲古華拉就等如（於）識玩古巴？」「Tin Ho」直言︰「食埋哲古華拉嘅人血饅頭。」
有人就問，唔知呢個團嘅團屨Y咪饅頭呢。「Joseph Li」就好體諒咁話︰「『?哲古華拉』都要食飯啦，搵食遮（啫）。」「中出羊子」揶揄︰「『哲墮華拉』帶你遊古巴。」
「曾師爺」質疑長毛咁做根本犯法︰「長毛此舉是領隊，與導遊一樣，需要讀書考牌，有領隊牌才可以帶團，否則涉無牌領隊，罸（罰）錢兼坐監。」咁係乜嘢驅使長毛咁做呢？「Firzo Pak」留言問︰「係愛定責任呀？」相信多數人心入面都已經諗起句︰「係窮啊！」
不過，由無業變成「隨團專家」，有啲人都戥長毛開心㗎。「熱狗（熱血公民）」前頭目狗達（黃洋達）語帶雙關咁話︰「起碼係正經生意。」「Chris Lo」亦話︰「正正經經搵份短期工。」「Eric Lam」亦話︰「街頭行乞，雞碎咁多，轉行做導遊帶街，呢次真係收皮嘞......收六皮。」「Phoebe Wong」就模仿長毛籌款嘅口吻話︰「俾（畀）小費時嗌，入錢入錢入錢！」
好過借劉霞籌款呃錢
咁又係，好過之前擺街站話「聲援」劉霞，棟埋個籌款箱出嚟，之後俾人追究啲錢有冇畀到劉霞時，就話自己「冇講過」幫劉霞籌款吖，呢個團點都叫明買明賣嘅。不過「lamd」懷疑之前捐過款嘅人唔會就咁算︰「去團時會唔會有團友問長毛：『捐俾（畀）劉霞D（啲）錢去咗邊？』」