■梁家傑唔熟書，亂罵老馮，自曝其短。 fb截圖攻擊老馮（馮檢基）似乎已經成為成個「泛民集團」嘅共同目標，除咗「民主動力」、劉小麗、Plan B你呃人（李卓人）、民協何啟明等等，公民黨主席梁家傑（袋巾）都加入炮轟。梁家傑前日知道老馮準備報名參選，即刻喺facebook出post話「報咗名唔可以退選個（嗰）噃！唔通阿基預先肯定知道小麗會被DQ？！厲害了阿基！」此言一出，唔止老馮開聲反駁，一班網民都恥笑梁家傑話唔可以退選「係咪懵咗」，仲模仿作句話︰「點解『泛民大台』要欽點李卓人做Plan B先？唔通飯民預先知道劉小麗會被DQ？！厲害了，阿飯！」
亂鬧唔畀退選 遭自己友指正
老馮放話要報名補選，梁家傑即刻撲出嚟封佢後路，話報咗名唔可以退選，又質疑老馮已知劉小麗會被DQ，結果就俾人恥笑返轉頭。
老馮噚日回應傳媒有關提問時就話，如果真係有預知能力，都應該係劉小麗而唔係自己，因為自4月開始，劉小麗已經同你呃人一齊亮相宣傳，極有部署，如果冇預知能力，就唔會咁安排。咁大個回力鏢飛返轉頭，真係幾難接招嘅。
唔止老馮，社民連村短（黃浩銘）雖然想踩多老馮兩腳，但都留言指正梁家傑嘅講法話︰「傑哥，阿基在提名期結束前尚可退選，但似乎天主已啟示阿基，小麗被DQ就一無掛慮。」
自己人指正完你仲幫手恥笑下老馮，其他人就冇咁客氣。中大「獨」講師劉正就喺佢個fb專頁「無神論者的巴別塔」度形容，梁家傑連喺提名期前可以退選都唔知，「真係老到懵咗好×可憐。」
fb專頁「狙擊政棍小隊」模仿造句「點解『泛民大台』要欽點李卓人做Plan B先？唔通飯民預先知道劉小麗會被DQ？！厲害了，阿飯！」再加一堆hashtag（標籤）話「點解報咗名唔可以退選」、「係咪懵咗」、「我叫你×頭傑」。
網民回帶「Plan C袁」反駁
唔少人就攞返上次立法會九龍西補選，民主黨Plan C袁（袁海文）閃報名又閃退一事出嚟講。「Sum Cheng」問︰「咁袁海文果（嗰）次又點解退選成功架（㗎）？……咁既（嘅）大話由有大律師身分（份）的人講出尼（嚟）真是有辱專業！」
要狙擊老馮又點止一個post，梁家傑噚日再發功，話老馮係「今天的我打倒昨天的我最完美示範」，聲稱佢2015年選區議員時，鬧自己個前民協黨友黃仲棋𠝹票，自己今日就𠝹返人票咁話。「狙擊政棍小隊」又再反擊，話兩件事根本唔同，首先當時老馮係時任議員，「而今次補選，我當劉小麗係原議員，但李卓人就絕對不是！」
其次，黃仲棋當年離開麗閣後一直冇返當區服務，12年後殺返出嚟話要選，而老馮已經喺九龍西服務30幾年，而你呃人就冇，「竟然有班狗屎垃圾走去話一個紮（扎）根九西幾十年嘅人去鎅（𠝹）一個由新西空降九西嘅人票？你××唔緊要，但都有個譜啦好無？」 ■香港文匯報記者 甘瑜