■《蘋果》話十一國慶日係「平行時空」喎，但自己又直播煙花，名副其實係「蘋」行時空。網上截圖有抹黑嘅機會就要盡情抽水，連死人都唔放過？有班「港獨」分子真係咁諗㗎。前日10月1日，「港獨」分子梁金城（金金）藉6年前南丫海難一事抽水，聲稱要「從另一角度看十一煙花」，更忽然熱心祭祀有關死難者。有網民怒斥梁金城等人騎劫海難一事，「死者家屬已經失去咗至親，麻煩你哋呢啲為咗呃選票同Cap水（斂財）嘅政治小丑死開，還家屬一個安靜嘅環境好冇？」
梁金城日前在facebook貼咗段短片，遠處放緊國慶煙花，「女長毛」雷玉蓮等則在鏡頭前燒衣紙，意圖對比國慶煙花嘅熱鬧同南丫海難死者嘅淒慘，仲形容成件事係「十月一日港殤煙花」喎。
其實，家屬悼念返自己離世嘅親人好合情合理，但又使鬼你班政客嚟幫人做對比咩？梁金城仲慌死冇人知咁，喺唔同群組貼個短片出嚟，係唔係真係為死難者、為死難者家屬着想，大家心照啦。
網民批騷擾遺屬安寧
「Quintin Lam」留言狠批︰「本來祭祖係好平常同必然嘅事，但係一但（旦）有人騎劫咗件事，就變得好嘔心。死者家屬已經失去咗至親，麻煩你哋呢啲為咗呃選票同Cap水嘅政治小丑死開，還家屬一個安靜嘅環境好冇？」
鬧住播煙花 《蘋果》養「港豬」？
抽死人水嘅唔止梁金城㗎，《蘋果日報》都報道咗梁金城呢壇嘢，仲用「平行時空」嚟形容呢個場面，話「有人選擇為煙花喝采（彩），有人選擇向死者致哀」，將十一國慶形容為「港殤」。其他反對派中人，基本上都係同一論調，話唔知有咩好慶喎。
一班反對派支持者同「港獨」分子就喺《蘋果》留言力撐，仲猛話睇煙花嘅人係「港豬」。公民黨前成員曾健超，仲喺轉發呢單新聞時話「這城市令人作嘔」咁喎。
不過，都有好多網民頂唔順成班反對派夾埋《蘋果》竟然連死人水都抽，特別係《蘋果》當日其實都有直播煙花匯演噃，似乎「平行時空」呢幾個字用返喺囧迨W更為合適。
「Jimmy Y Yau」狠批︰「裝模作樣話要為南丫島海難死者哀悼，實際上就係政治抽水。」「Terrence Yiu」直指：「講真如果唔係因為起（喺）正國慶你地（哋）會咁重視南丫海難咩？又唔見有人提屯公大埔翻巴士、淘大（迷你倉）火災？借題發揮！」
「Kevin Chan」亦話：「呢單野（嘢）發生係（喺）國慶先有新聞價值啫！蘋果明報泛民先會年年拎死者出嚟抽水！你睇下7月10日的新聞有冇人會提那單意外（2003年7月10日一輛九巴在香港屯門公路高架橋墜下，造成21人死亡的慘劇）。」
老蘭新年慘劇 唔通禁搞活動？
「Chan Wai」就回帶：「蘭桂坊咪新年死咗成廿人，唔通年年都唔畀攪（搞）活動咩？」「Kevin Chan」狠批︰「每年利用死人抽水時間又到，有幾多人真係致哀？咪又係拎死者抽水！自己選擇啫！請大家每年除夕都為蘭桂坊人踩人死難者默哀。」
「Lisa So」就揶揄：「 蘋果係咪精神分裂呢？呢頭講南丫海難，呢頭直播煙花...」「Frederick Yeung」亦話：「蘋果日報係悼念既（嘅）話今（前）晚FB不應直播煙花，太令人失望！」
講到嗰日笑都犯法咁，但同《蘋果》同一集團嘅《飲食男女》就喺國慶前夕幫大家精選咗一系列睇煙花必去嘅海景餐廳喎！冇嘢嘅，佢哋報紙覺得「港殤」，雜誌覺得「搵食啫，犯法啊」，咁咪完美演繹《蘋果》所講嘅「平行時空」囉，一定係咁。■香港文匯報記者 甘瑜