唔少人因為參與前年旺角暴亂而入冊，已經報名參加立法會九龍西補選嘅老馮（馮檢基），就話諗住搞社企，等佢哋出咗冊都可以有啲細藝，費事成世流流長嘥咗咁話，即刻俾主流反對派話佢拉攏激進選票。佢日前接受網媒訪問時就話，如果佢真係想宣傳，就應該喺今年1月反對派「初選」就攞呢個議題出嚟，唔使等到𠵱家喎。不過，即使老馮真係為咗選票先咁講，主流反對派仲有乜板斧應對吖，特別係同樣出選嘅小麗老千（劉小麗）喺旺暴當晚有份吹雞，之後就同班友割席，𠵱家喺激進派入面做咗票房毒藥嚕。
擬搞社企幫旺暴出冊者
老馮日前接受親激進派嘅網媒《TMHK》訪問時，先利申自己唔同意用武力處理社會問題同「不公義」，但覺得旺暴班友唔係「大奸大惡」，無殺人放火乘機搶掠，所以希望可以提供平台畀佢哋企起身，諗住用佢過往籌辦多間社企嘅經驗，開間類似咖啡店、小食店或者係文化舖頭嘅社企，等佢哋出咗冊都可以有啲細藝，就業機會得到保障，將來仲有機會做老闆𠻹。
今年年初開始，老馮就俾主流反對派片到體無完膚，今次做到佢哋做唔到嘅嘢，佢哋當然唔高興啦，仲鬧佢咁講係為咗選票。老馮反駁話，如果真係想乘機做政治宣傳，就唔應該𠵱家做，應該喺今年1月反對派「初選」就攞呢個議題出嚟，不過由於自己個政治意識形態以至行為都同激進派唔同，佢無呢一類嘅朋友，但自從佢話考慮參加補選之後，就有激進派支持佢，「所以呢次補選呢，係成為一個引發點讓我同呢班朋友有接觸，呢個接觸點好奇妙。」
不過，老馮過往「又傾又砌」，會唔會因為「忽然激進」而得失既有支持者先？佢就話希望支持者唔係用呢個角度去睇呢件事，「我哋睇呢件事係，佢係香港後生仔，佢對香港有一份投入，佢對香港嘅發展、政治發展有一個睇法，當然嗰啲睇法未必同我哋一樣，我好清楚嗰啲睇法同我唔一樣，嗰啲睇法到嗰件事，我都係唔同意佢哋，但係當然唔等於我哋放棄佢哋。」
神駒：「心意」勝過割席小麗
其實老馮早前已經喺「無敵神駒」仇思達個節目度穿咗橋，神駒些牙（分享）個報道時就話，雖然計劃十劃未有一撇，要持續監察住先，但係老馮嘅「心意」已經好過「泛民」嘴臉千百倍，「范國威宣稱會探監、梁國雄質問別人有無聽審及坐過監、『魚蛋之母』劉小麗更是與所有『義士』劃清界線；唯獨是基哥實事求是，憑藉自身經驗和優勢，嘗試為『義士』尋找出路，那是難能可貴的。」
神駒個下把「陳興旺」亦都話，畀着係前學聯常委張秀賢處理呢個議題，佢一定係叫人捐錢去學聯個「抗爭基金」。
又係嘅，主流反對派譴責完旺暴之後，就當班友係搖錢樹，成立基金叫人科水幫「義士」，但有幾多「行政費」、「手續費」就佢哋自己知嘞。探監？佢哋淨係識探嗰「13+3」、即係「東北案」同衝擊政總案中班自己友啫。■香港文匯報記者 陳庭佳