■游清源被「麗粉」指罵。 fb截圖游清源暗寸「唔老實」 即被群起圍攻
已經報名參加立法會九龍西補選嘅劉小麗，喺一眾反對派大佬發功之下，已經晉身做刀槍不入嘅「宇宙唯一民主派」，邊個夠膽講佢壞話，都會俾佢班「護法」打到落十八層地獄咁滯，就連自己友都無情講。好似親反對派網媒《852郵報》創辦人游清源，日前就攞咗妎]步條宣傳片嚟品評一下，話佢無跑開步就唔好話自己跑開，質疑佢唔老實，即刻俾一班劉小麗盲粉起勢鬧係「鬼」、有乜居心諸如此類。所以話，一旦俾劉小麗呢啲人當選到，凡有反對派意見一律打為「收咗錢」嘅「鬼」，「民主獨裁」嘅情況只會越來越嚴重。 ■香港文匯報記者 陳庭佳
喺上次立法會九龍西補選，反對派明明畀民協前主席馮檢基參加反對派嘅「初選」，即係承認佢係自己人，但短短幾個月，當馮檢基反對劉小麗夾埋成班反對派大佬唔搞「初選」，而欽點咗你呃人（李卓人）做Plan B，話小麗一旦被DQ佢就會出嚟選，佢哋就即刻反面，翻返20幾年前嘅料話吽u唔係民主派」，爭位係「收咗錢」、係「鬼」，可見所謂「民主」只係口號嚟嘅啫，「獨裁」先係佢哋真面目。
游暗指小麗「裝假狗」扮跑手
原名袁耀清嘅游清源前日就喺網台「D100」節目品評咗劉小麗嗰條《步履不停》選舉宣傳片，話一睇條片，就知劉小麗根本唔似係一個成日跑步嘅人，唔應該話自己一直有跑步習慣，又意有所指咁話誠實先至係競選嘅最佳策略，「就算要用呢條橋你都要老實，如果唔係就唔應該亂講。」
佢仲話，劉小麗個團隊幫佢諗「Run for Hong Kong」呢條橋「係得嘅」，「但係你要睇人呀嘛，唔好夾硬嚟」，而即使要拍跑步宣傳片，都唔應該揀啲空氣污濁嘅地方拍喎。
盲粉反斥游「鬼上身」阻選舉
劉小麗班「護法」聽到心目中嘅「女神」同唔老實扯上關係，好似觸動咗邊條三叉神經咁。「Richard Kwok」話：「有冇搞錯咁都插？講到底你同大班（『D100』創辦人鄭經翰）都想佢自我批判，話自己宣誓搞嘢俾人DQ抵Q死......你們『D100』在此選舉關鍵時刻迫她道歉，意欲何為？」疑似剩係識二元思考嘅「Chan Fool」就話：「『D100』其中一隻鬼做嘢啦。」
「Uno Hoo」就唔知直定曲，咁樣幫42歲嘅劉小麗講嘢：「佢嘅跑姿係比較姐手姐腳，但唔可以肯定話佢『無跑開』，因為有啲中年女士都係咁姿勢咁裝扮，但一樣係成日跑。唔係後生女貼身背心短褲啫，呢個批評有欠公允。」「杜比」加把口：「我樓下啲阿婆都係咁跑，跑得好慢、好慢，通常我急腳行會快過佢哋。」
有啲網民就頂唔順呢班劉小麗盲粉。「Christopher Cheng」話：「唔百分百無條件無批評地支持『宇宙唯一民主派』嘅都係鬼。」「Sylvia Mo」就同意游清源：「唔要齋口號抗爭，平凡即係得過且過啦。」
平凡？係咪講緊劉小麗句「守護平凡的幸福」呀？除咗游清源之外，同樣都係親反對派嘅《蘋果日報》早幾日亦都報道過，就連畀提名劉小麗嘅選民都唔明句嘢講乜，「點叫平凡幸福啊？平凡幸福即係代表乜啊？」而佢嘅團隊成員亦都承認句嘢離地，未能產生足夠共鳴。游清源打骰嘅《852郵報》，亦都摷返呢篇報道擺上網。
就連《蘋果》亦都對劉小麗啲文宣、公關有所質疑，其實班反對派大佬係咪應該諗吓，咁樣將佢捧到「宇宙唯一」咁，用盡全力打壓所有不同意見，係咪真係服到眾呢？所謂「自由」喎、「公義」喎、「民主」喎，其實都係一句口號嚟嘅啫，咁嘅人當選咗會帶來咩效果，相信唔使講，大家都會估到啦。