呢個世界有啲嘢真係物極必反：老馮（馮檢基）自從2015年輸咗區議會、2016年輸埋立法會，政治能量已經大減，但反對派接二連三喺兩次立法會九龍西補選度瘋狂「屈基」，咁又幫佢儲返啲抱打不平嘅人氣同支持。繼《蘋果日報》、「泛民大台」正式DQ老馮作為「民主派」嘅身份之後，前傳媒人張寶華噚日都喺facebook出文，話老馮唔應該出嚟選、反對派只可以有一個人出選，叫大家點都要投畀劉小麗，點知就俾網民秒殺︰「咁點解唔投畀老馮？」
鬧住撐小麗 寸老馮阻碇
張寶華早兩日喺fb出文，話自己「不喜歡劉小麗」，話劉小麗「不值得」支持，因為佢「太愚蠢」，龜速宣誓一事係「自己給敵人『籍（藉）口』」，揶揄佢仲扮受害者，搞到反對派喺立法會冇咗否決權「簡直是罪該萬死」，要人再次含淚支持係「難委（為）了選民」。
咁係咪唔好投劉小麗呢？非也，張寶華神邏輯急轉彎，話大家冇選擇，即使含淚兼含恨，都要「支持劉小姐」喎。佢聲稱，唔知道反對派決定劉小麗出選係咪民主，但總之代表只可以得一個，可以係劉小麗、你呃人（李卓人）或老馮。
講係咁講，張寶華又掟多個靚彎，質問老馮點解會「突然冒出頭來」，聲言「這個是不能饒恕的」，因為佢會「減低」咗劉小麗嘅票，「傷了自己，益了敵人。這個比劉小麗的愚蠢更罪無可恕。」
唔少人質疑張寶華嘅講法。「Frank Puk」問︰「上一次馮檢基就係俾『民主派』話咩plan A，plan B，之後佢就話唔出黎（嚟）選，咁佢老人家條氣唔順，今次再出黎（嚟）選，老實講我又覺得佢無做錯。你點睇？」張寶華九唔搭八咁回應︰「咩都好，一個人出。」
懶理質疑 投劉棄馮無限loop
「Carl Chan」亦質疑︰「張小姐，你自己都明言劉小姐萬般不是，又講到亦可選其他人，結論係應只出一人。咁點解你成遍（篇）嘢唔係叫劉小姐退選而矛頭指向馮生？」曾為傳媒人嘅張寶華慘變錄音機再答︰「其實邊個都可以，總之一個。」
「張兆昌」追問︰「基哥比小麗好？小麗要讓路才對？」張寶華再做錄音機︰「是旦（但）一個，總之一個。」真係是但回覆，總之唔答你點解唔係老馮優先。
「Kam Ling Chan」就冇再問張寶華啦，直接發表意見︰「為何不是劉小麗讓路比（畀）馮檢基？為何每次都要迫馮檢基讓？說穿了，是利益！老馮點保守，點形象差都好，都唔會好似小麗咁ON（戇）居，自己走去放棄議席，我覺得唔值得原諒，浪費了我一票！」
「Zoe Fong」亦留言講返個唔民主嘅決定過程︰「如果一開始，『泛民』班大佬唔係私相授受，肯攪（搞）初選，就唔會有今日呢個地步！......唔好成日攞『大局為重』出嚟壓人，好多人都唔會受呡（呢）一套，『民主派』唔講民主，選擇唔係比（畀）返選民，咁唔好學人講『公義』。」
■香港文匯報記者 甘瑜