以《蘋果日報》為首嘅反對派黨媒，為咗捧劉小麗，唔單止將所有批評劉小麗甚至只係有啲唔同意見嘅人都抹黑係「收咗錢」嘅鬼，就連之前出盡吃奶之力捧嘅自己友，都要幫劉小麗「墊屍底」。《蘋果日報》此前就發咗一篇文，通篇講蟲炎（姚松炎）同幫佢助選嘅朱隊友（朱凱廸）上次補選時表現幾咁「失敗」，劉小麗已經汲取呢個教訓云云。
喺上次立法會九龍西補選，蟲炎同佢助選嘅朱隊友，無論政綱以至宣傳手法都離地到不得了，甚至可以用騎呢嚟形容。輸咗之後，蟲炎同朱隊友梗係唔認係自己做得唔好，而《蘋果》等反對派黨媒就賴話係老馮（民協前主席馮檢基）冇盡力為蟲炎拉票，成班反對派盲粉更侮辱當區居民係「飲鉛水飲壞腦」、「食蛇齋餅䒏麂嚆j咗」等等。
轉口風認蟲炎失敗
補選又嚟啦，今次劉小麗上陣，估唔到《蘋果》突然又承認蟲炎上次敗選，係因為佢「選舉工程備受批評」。點解突然改口，咪就係為咗贏，就不惜要蟲炎「墊屍底」嚟捧起劉小麗囉。
話說《蘋果》早前報道，話反對派今次嘅補選工程同上次有「極大分別」，話「有指」蟲炎與民主黨等地區樁腳劃清界線，以「自己嘅方式」迎戰；通過單車巡遊嚟宣傳自己係「離地」，橫額亦簡陋「醜樣」；以「反DQ」的政治議題為宣傳主軸，忽略談地區民生事務等等。
該篇報道嘅重點，當然係話劉小麗今次已經汲取咗蟲炎敗選嘅教訓，包括同主流反對派緊密合作，搞後援會穩住地區樁腳，冇特別打DQ牌而係多講地區關注嘅街市以至沙中線工程等問題云云。
本來，反對派黨媒捧小麗就預咗嘅，只係諗唔到蟲炎同朱隊友會躺着也中槍啫！
■香港文匯報記者 陳川