■美味棧都好快製作出「任何仁」的惡搞圖。 網上截圖消防處最新應急大使「任何仁」昨日一登場，即引起網友惡搞洗版。由於造型搶眼，網民有彈有讚。
有人話似阿凡達嘅膚色，個LOOK唔知想點。又有人話一睇就知係《名偵探柯南》入面嘅兇手「黑影人」啦！唔少facebook專頁都改圖惡搞。網民Wai LO話：「真心讚，今日引起好多人注意，擊（激）活人心，仲要無懼網絡改圖。」
有人更有創意，話個「任何仁」令佢諗起AV片嘅透明人間，然後就聯想埋「AV仁(何俊仁)」，咁網民FFai Lun直頭就話：「如果揭開個頭套係何俊仁，咁個宣傳會再勁啲。」不過都有人唔受落，網民Arion Ho就嘆息：「雄糾糾嘅消防變咗小丑，陰公！」
經過一輪洗版，消防處個fb專頁昨晚就再出post，話「多謝大家關注」，「任何仁」又出場，話「我係乜人？任何仁就係每一個人，英文名叫Anyone。你同我都要準備做個任何仁！可能救自己家人，身邊人。你準備好未？」個Hashtag最正，寫明「#各行各業都要準備好救人」、「#惡搞不忘報course擊活人心等住你」、「#你哋諗多咗喇我邊有資格做消防處吉祥物吖」、「#香港人創意爆燈」，識得自嘲，唔怕惡搞，消防處呢次又真係「堅唔離地」喎。 ■香港文匯報記者 李逸燊