為咗谷人「含淚投票」畀欽點嘅工黨李卓人，其他反對派大佬頻頻出言「恐嚇」，例如公民黨主席梁家傑就又再sell話要喺分組點票時保住直選議席均勢嘅「關鍵一席」，如果佢輸咗，特區政府就可以「夾硬」喺立法會通過基本法第二十三條立法之類。查實，二十三條之類嘅政府法案唔需要分組點票，只要全體議員大多數支持就可以過到，所以根本就係誤導，但講返轉頭，反對派成班立法會議員成日缺席投票，就算畀你入到去，咪一樣咩都保唔到？又何必呃自己支持者呢？
搞錯議規 搶席無阻政府法案
話說梁家傑幫李卓人助選團隊做咗個專訪，話「如果這次我們勝選，還可以先奪回直選議席中17對17的均勢，阻止保皇黨修改議事規則；但萬一不幸輸了，則保皇黨就能為所欲為要民主派噤聲，廿三條、國歌法，話過就過，如入無人之境」喎。喂阿哥，呢啲政府法案，係唔使分組投票嗰噃，咁分明係誤導人嘅啫！
「人民力量」前主席袁彌明個老公林雨陽就以上周立法會表決施政報告致謝動議投票時，有幾個反對派議員竟然冇投票，留言挑機：「仲有咩關鍵一席可言呢！琴（前）日陳淑莊都走咗去冇投票 ~」
李卓人支持者董紹興就質疑林雨陽誤導：「如果陳淑莊投埋票只係17對16，如果李卓人入到去就17對17，所以絕對有關鍵一度（席）之說！」林雨陽就寸佢：「李卓人入到去，陳淑莊唔投票，結果都係17:16。simple math.『泛民』唔出席根本沒有『關鍵』。」
中文大學「獨」講師劉正亦喺佢fb專頁發帖，其中引用當日投票時缺席嘅莫乃光，向傳媒解釋時話自己當日之所以早走，係因為嗰晚要食瀉藥，第二日去照胃鏡，仲話「反正我嗰一票影響唔倒（到）投票結果啦」。
「飯」民屢缺席 「獨」師批嘥氣
劉正就開火：「你夠膽咁講就無問題勒（嘞）！之前李卓人同班飯民大台開口埋口話咩『關鍵一席』，尹兆堅講乜×嘢『民主派多一席少一席響抗爭方面爭好遠』，乜原本（來）去到最尾自己決定唔開會嘅時候，個答案竟然會係『反正我果（嗰）一票影響唔倒（到）投票結果啦。』你叫成班黃屍情何以堪？」
佢仲話，更衰格嘅係公民黨郭榮鏗同陳淑莊同樣缺席投票，但連一個解釋都「無需要」，「我就係擺明唔投班黃屍都照支持我，吹咩！......然後你個飯民大台連自己果（嗰）班議員都管束唔倒（到），仲好意思反過黎（嚟）迫選民支持你地（哋）？有咩資格呀你班垃圾！我又再三問多幾次，今次選舉，仲有乜嘢原因一定要投李卓人？」
佢仲摷埋立法會11月2日嘅財委會會議，討論申請加開兩個首長級常額職位、調配3個首長級職位去做東大嶼填海研究，「竟然有11位飯民垃圾會議員，亦即涂謹申尹兆堅林卓廷郭家麒郭榮鏗譚文豪張超雄梁耀忠梁繼昌葉建源李國麟缺席投票！」
劉正狠批，「你班政棍將反對東大嶼填海計劃講到天咁高，點解都可以響11月2日政府響財委會提出嘅試探性撥款上面，戰線全面潰散？喂而（𠵱）家唔係講緊一個半個缺席投票咁簡單，而係民主黨有3個、公民黨又有3個，專業議政有4個，然後連工黨街工全部有份！」
佢話，「關鍵一席」有一個「好重要嘅概念」，「就係唔係你飯民黃屍、甚或你李卓人自己話係就係，而係要所有飯民主派都有自覺自己係『關鍵一席』咁先有意思；只要有一個覺得唔係，都唔好講咩抗爭，咁就算你點樣努力響議會度開會投票，你果（嗰）席永遠都唔會係『關鍵』。......又先唔好講李卓人呢條老屎忽本身都前科累累（纍纍），又支持港珠澳大橋撥款又支持修改議事規則，就算當佢今時今日洗心革面（其實好難），你班『隊友』全面放pair（放軟手腳）之下，選多個李卓人入去又有咩分別？」 ■香港文匯報記者 陳川