■基仔為新碟到屋邨取景。香港文匯報訊（記者 李思穎）古巨基全新廣東EP《維多利亞 VICTORIA l 》會於下周二（11日）推出，同時他又收到公司好消息，將會明年4月舉行演唱會Part 2 ，基仔可謂雙喜臨門！
基仔的《WE我們世界巡迴演唱會》5月時連開5場，反應熱烈，歌迷不停要求再做part2！終於基仔開心宣佈：「拿到紅館檔期了！2019年4月再做Part2！今個月18號會開始優先訂購啦！上次買唔到飛嘅歌迷就要留意撲飛喇∼今次Part 2，當然喺rundown、製作上都會有新改動，但係詳細要賣下關子先，等遲下開完會先公佈。」
最近基仔就為全新廣東EP《維多利亞 VICTORIA l 》，於香港大街小巷中拍封面及內頁照，於不少香港特色景點取景，包括街市，大牌檔、涼茶舖、屋邨士多、電子遊戲機中心、金魚街等，他透露︰「唱片是以香港故事為題，所以特別選了一些陪伴我們香港人成長的生活場景去拍攝封面。重返小時候經常陪嫲嫲去買餸的街市，細個最喜愛的蒲點『機竇』，還有士多、金魚街、電車等，影相當日深刻感受到香港人的人情味。好似在南山邨撞到一班大學生，原來他們讀電影，將來大家都可能有機會成為同行，大家談得很投契，就順便邀請埋一起影相；落街市影買菜，又見到好多叔伯姨姨，個個都當我仔一樣，個個都要影合照，終於我地影到成個街市衝晒出來大合照，非常熱鬧。而街市旁邊有幾架貨車喺度等上落貨，哥哥仔竟然開大個喇叭，播《愛與誠》、《友共情》，那刻真的覺得香港人嗰種地道人情味，真是令人暖笠笠。」
機竇尋回童年回憶
基仔在讀書時期，回家放下書包換件衫，第一時間就衝去機竇排隊等「挑機」，可惜今時今日很多機舖結業，終於搵到一間影相留念，基仔把握機會，也有「落場」玩下，拿着換回來的大餅（港幣一蚊），當刻他從心底感動出來，如像時光倒流幾十年返回細路仔年代，諗起自己童年好多珍貴回憶。
基仔為配合主題，今次專輯封套會用一個仿舊式曬相店所用的相袋設計， 當大家買這張專輯回家時，就會擁有昔日曬相的心情，裡面照片和歌詞集會印製成3R相片，似足從前，大家拿到沖曬好的照片，拎返屋企大家一齊睇嗰種開心感覺。