■「求驗傳媒」批評壹仔毫無職業操守。 fb截圖新聞當然要講事實，講傳言仲講到唔關事嘅圖文並茂，就真係過咗火囉。話說壹仔（《壹週刊》）最近出咗篇報道，話大學宿舍變「炮房」，班大學生喺房度大搞「淫亂派對」。不過寫就寫到咁精彩，點知睇埋內文，原來成篇都係單靠一個「畢業生」嘅口述，仲要冇圖冇片冇日期，結果一眾網友鬧爆壹仔傳媒操守跌到一地都係，facebook專頁「求驗傳媒」亦都點名批評。
僅靠「畢業生」吹 製意淫圖唱衰
壹仔日前出咗篇報道，大大條題寫住「大學宿舍變炮房 6男女宿舍房飲大咗 1男2女同床啜啜聲」，仲要配幾張意淫圖片，令人以為單嘢真係好爆！點知睇埋內文，先發現原來得個講字。
「求驗傳媒」出文批評篇報道淨係得條題夠吸引，但內文擺到明就係傳媒操守嘅反面教材：「整篇報道，《壹週刊》單憑一名『畢業生』的口述，沒有相片影片，甚至沒有年份日期，便可以寫一段『新聞』出來，更把一堆無關的片段『剪埋一碟』，但沒有寫明是『資料片段』或影片來源。」
借題責難大學 「求驗傳媒」狠批
「求驗傳媒」又鬧：「最令人氣憤的，是在沒有真憑實據的情況下，把某大學的校名公開了。找一些無法證實的問題，要求對方回應，然後無論對方回應與否，都公開對方的名字，這是絕對不負責任的採訪手法。」
「求驗傳媒」反問，係咪其他媒體都可以搵個「《壹週刊》前員工」，冇提供任何證據後爆料，然後要求壹傳媒回應，再剪一堆似是而非嘅片造「新聞」呢？
網民「杜比」就話：「（壹仔）由創刊已是這樣，只是收咗錢既『泛民』先會為這些歪曲事實誨淫誨盜嘅傳媒講好說話。」「Andrew Chui」就揶揄壹仔作故仔：「求其上網搵啲傳聞就當係新聞。」 ■香港文匯報記者 何西