■政制及內地事務局請人開微信專頁，唔少人都認為係份筍工。網頁截圖個個打工仔都希望有份又好玩、人工又高嘅筍工啦！特區政府政制及內地事務局開咗一個非公務員職位空缺，想請一個社交媒體主管，負責籌備開設同運作粵港澳大灣區微信專頁，向內地讀者推廣香港對推進大灣區建設嘅展望同活動等，人工有成八萬蚊一個月咁滯𠻹，仲高過衛生署合約制醫生同埋教育局課程主任。不過，唔係個個都可以做到飛雲，把握呢個咁筍嘅機會㗎，因為當局要求申請人大學中文系或者新聞系畢業，仲要喺傳媒及傳訊、公關或者數碼市場推廣方面有10年或者以上的經驗𠻹。
專責向灣區推廣香港
呢個位嘅主要職責係負責籌備開設、管理同運作粵港澳大灣區微信專頁，出po（帖文）向內地讀者推廣香港對推進大灣區建設嘅展望、新措施同活動等，仲有就大灣區建設相關嘅課題進行研究，並且報道相關活動項目等，聽落好似都要掂幾多瓣。
月薪78,350蚊，睇嚟幾高吓，年假就係比較少嘅12日，但合約只係得12個月，如果可以圓滿履行合約，並喺合約期內維持良好表現同行為，就可獲發合約內底薪總額的15%嘅約滿酬金，即係大約14萬蚊。
入職條件方面，當局要求申請人必須持有香港任何一所大學頒發的中文系或新聞系學士以上學歷，並喺傳媒及傳訊、公共關係或數碼市場推廣方面具備10年或以上嘅工作經驗，同熟悉時事、社交媒體市場推廣工作。
同時，如果申請人持有工商管理學系或市場學系碩士或更高學位，以及具備與內地傳媒行業相關嘅管理工作經驗，更會獲優先考慮。
唔少網民見到呢個位就雙眼發光，睇嚟呢個位競爭都好大吓。「Daniel Ip」就話「呢個真係筍位」，「Dollar Aries」就問其他人：「出咗雙糧同Bonus（獎金）未，出咗就轉工啦。」
「Chris Chan」似乎覺得份工好hea咁喎：「日日上吓微信專頁，Update（更新）吓就收 7.8萬（蚊）...... 」仲有勁多網民都tag佢哋嘅朋友仔，叫佢哋快啲申請呢份「絕世筍工」。不過咁，10年經驗，8萬蚊一個月，喺好多行業都係好閒嘅一件事啫，可能係傳媒同公關呢行人工一向跑輸大市，所以呢個位嘅出現先引起咁大反應！ ■香港文匯報記者 馬壯