香港文匯報訊（記者 梁靜儀）郭晉安(安仔)與陳柏宇(Jason)昨日到中央圖書館出席活動，分享親子共讀心得，活動上，安仔表示由於是基督徒，每晚在臨睡前都會與子女一起讀聖經，他坦言小時候不愛讀書，屋企人叫他讀書，他會由街頭走到去街尾，但世界好特別，當他睇劇本之後，就明白書到用時方恨少，他就開始看不同的書，從中看不同的人生，繼而對演戲都有幫助。
安仔又向大家推介一本靈修書，他指兩年前睇到這本書，帶出一個訊息給他，教識他不要急，原來急是會唔尊重身邊人，以前他會要求仔女做什麼都要快，當看完該書後，才學習到毋須太急，連帶子女脾氣也轉化變得溫和，現在家中氣氛會較安靜。
陳柏宇表示女兒已七個月大，他也有伴讀的習慣，都希望她鍾意閱讀，他笑說：「因為可以靜啲，自己可以做好多其他嘢，我又可以透過閱讀同佢建立一個關係。」活動後安仔與Jason一起接受訪問，談到湊小朋友心得，安仔說：「慢慢睇住他們長大，真係連命都畀埋佢，尤其係女好窩心，仔就唔同，你要入去佢個心諗佢諗乜，(較為偏心女兒？）少少啦！但唔係偏心，係唔同類型的關心。」