■有網民出帖呼籲參與者和平示威，即惹來梁頌恆出文反駁。 fb截圖個個都搞遊行示威，唔通個個都淨係想遊行示威咩，實有啲人係想搞事。反對派近日係咁催谷佢哋嚟緊星期日個反修例遊行，有啲「左膠」就擔心俾啲暴力分子壞事，就話驚有人「扮遊行人士特登引發暴力衝突」，希望大會強調今次係「100%和平示威」喎。「香港民族陣綫」發言人的士梁（梁頌恆）就反駁呢種睇法，話呢啲係「教條主義上腦」、「時刻準備篤灰既（嘅）蛋散」喎，仲叫人「唔好亂指責『有準備的人』係鬼」，呢啲「港獨」分子真係惡到呢。
早兩日有網民喺網上討論區「連登」開post，話自己對遊行「咩都唔怕」，但驚有「遊行人士特登引發暴力衝突」，直言唔識分邊啲係鬼，「所以我覺得主辦方有需要喺遊行前高調表明呢個係100%和平示威，絕唔會主動挑起暴力衝突。到時真係有人搞事既（嘅）都有得駁。」
不過，唔少激進反對派已經冇咗和平理性非暴力的價值觀嘞。網民「馬×代夫」話︰「出黎（嚟）志在打咭（卡）既（嘅）一定口講和平唔好還手，但企過前線都知有d（啲）野（嘢）冇得避免。」
「沙皮」揶揄話︰「100%和平示威，政府表示歡迎，之後（修例）順利通過。」
借題縱容「有準備的人」
「的士梁」就轉載咗個post喺自己facebook然後開罵，話自己「就係想××呢d（啲）教條主義上腦時刻準備篤灰既（嘅）蛋散。」
佢仲話，大家面對「殺人政權」，自己冇覺悟同準備，「都唔好亂指責『有準備的人』係鬼」，如果唔係就同敵人冇分別喎。「Shek Hilton」亦留言話主張和平嘅人︰「又係呢種聽到悶既（嘅）論調。」
網民食花生 等睇大龍鳳
部分人就分享「的士梁」嘅文，似乎好想當日搞大佢。「Wong Hiu Ping」話︰「如果6月9號都仲係講緊『邊個衝邊個就係鬼』嘅話，你行埋我個份la（啦）......」「火爆三港女」仲叫大家「思考」下︰「有人支持繼續100%和平，無問題嘅。不過我希望唔好再話有其他做法嘅人係鬼，阻止傷害又或者篤灰。你有你嘅方法，我都認為無用架（㗎），但我會尊重你嘅選擇。『佔中』夠和平未？香港人行左（咗）30年，得到啲咩？『泛民』呢排喺立法會都好『勇武』喎！我唔知咩野（嘢）方法work（可行），但我認為香港已經到左（咗）『呢個地步』，點解唔試下唔同嘅方式。」
睇嚟大家都要放長雙眼睇吓當日會唔會打仗咁款啦。不過，講返點樣分辨「鬼」，「Nicotine」就講咗個幾有參考價值嘅指標︰「叫人衝，自己唔衝嗰個一定係臥底。」
咦？咁似話要衝擊中聯辦但自己搭的士走咗嘅「的士梁」嘅？■香港文匯報記者 甘瑜