■梁金成被拍攝到密會侯志強。 網上圖片反對派策動的反修例行動已開始禍延至各區，其中「金金大師」梁金成就發起今日的所謂「光復上水」遊行，估計又會吸引唔少「勇武」分子及惟恐天下不亂者參與。遊行是為了所謂「大義」？咪傻啦！有網民在連登討論區「有圖有真相」咁踢爆梁金成曾密會上水區鄉事委員會主席侯志強，之後就同警方申請咗條無乜影響性嘅遊行路線，背後肯定有陰謀，並呼籲其他參與者小心俾人利用，要識得執生。呢班人各懷鬼胎，上水人睇嚟都係要自求多福。
「VIP房食4個鐘飯」
有網民「踢爆」日前到粉嶺一間酒樓食飯時，見到梁金成同侯志強喺VIP房食咗4個鐘飯，點知事隔1日，梁金成就同警察傾咗條完全對水貨客無影響嘅遊行路線出嚟。佢仲話，條路線只係包圍住個舊墟兜圈，完全唔知行嚟有咩用。
有傳媒其後報道呢件事，仲先後搵咗梁金成同侯志強兩人問回應。梁金成只係話有「中間人」聯絡過佢，希望取消「光復行動」，但已被他拒絕，又「縮沙」指自己只係協助市民申請不反對通知書同規劃遊行路線。
侯志強在接受傳媒查詢時稱，從無叫人不要去遊行，又稱自己曾參與6月9日、12日及16日的遊行示威，21日包圍警總也在外圍「湊熱鬧」。今日，他會在上水設站為示威者免費供應水：「我支持合法、理性、守法遊行，但我不支持違法，包括互相指罵......能夠有更多人（示威者）來上水行行，表達意見，商戶及購物人士就會檢點，不要妨礙街坊，這是好事啊！」
網民對此反應極大。「踢爆」飯局一事嘅網民怒罵梁金成：「講得咁好聽話自己同『中間人』傾，就係唔想你地（哋）知見嗰個其實係『左派狗』。唔係做乜比（俾）人篤爆咗都仲要堅持唔認？」總括嚟講，佢認為如果要SAY NO，好似班學生咁拒絕林鄭咪得囉，駛（使）乜仲要咁好閒情坐低食飯傾足4粒鐘呀。佢仲話：「真係連白鴿（民主黨）年頭個遊行條路線都好過你，你醜唔醜？」
網民質疑勾結鄉事
不少網民加入譴責行列，「代你白頭」話收到風，梁金成諗住派人同其他反對派中人對選，仲話「留名睇叫完人衝，自己就縮」。「旺尖旺金毛玲」則話：「個個出黎（嚟）受棍打 你就走去勾結鄉事？」亦有人翻舊賬，話本身也是「北區水貨客關注組」發言人嘅梁金成曾於2016年發起「五．一上水齊勞動」有約百人參與，他於當日稱收到可靠消息，指疑有黑幫混入遊行隊伍「搞事」而突然宣佈取消行動。 ■香港文匯報記者 鍾立