■梁金成交代轉戰出選石湖墟原因。 fb圖片民主黨林卓廷喺政壇仇口多就係人都知，之前先搞到幾十個黨友退黨，但原來佢連專門反水貨客嘅梁金成都得罪埋。梁金成噚日喺facebook出文，話自己上屆喺彩園區輸咗後，本身想繼續喺嗰區努力，但林卓廷明知嘅情況下依然其後派咗個社區幹事落去，仲好大官威咁話「叫金金去第二個區啦」，結果梁金成就去咗石湖墟同林卓廷爭嘞。林卓廷噚日亦有出文回應事件，並冇承認或否認呢件事，但就話個幹事「長期恒常服務彩園彩蒲區」，而梁金成「鮮有地區工作」，所以先「有能者居之」。咁樣講嘢，唔怪得之佢咁多仇口啦。
梁金成噚日喺fb出文，剖白自己點解今次區議會選舉會轉戰石湖墟。佢話，4年前自己喺彩園高票落選，「當年『林姓議員』曾問金金會否繼續狙擊下去，金金當時已表明希望繼續服務彩園區街坊，同時『林姓議員』亦向金金表示給予他時間處理水貨問題，並希望金金暫時不要進行激進反水貨行動，以免會影響他的行動。」
不過，3年幾前，亦即係叫人唔好做嘢一年幾後，林卓廷就喺無協商嘅情況下，叫咗個社區幹事林子琼落彩園區。梁金成方面都曾經問過林卓廷點解要咁做，點知對方話︰「叫金金去第二個區啦！我哋嘅人多街坊支持過佢呀！」
梁金成留一線 籲票投林子琼
梁金成話，有見林卓廷有做到佢嘅競選承諾，自己又費事喺彩園同林子琼爭，令到建制派參選人贏到，所以就報選石湖墟。佢仲話︰「正所謂能者居之，『林姓雙料議員』在立法會事務繁重下分身乏術，根本不能全心全意服務區內各位街坊，那麼請不戀棧議席，讓真正有心人士：梁金成（金金）去為大家服務！」雖然擺明同林卓廷爭石湖墟，但佢都叫咗大家喺彩園含淚投畀林子琼咁話。
林批梁「鮮有地區工作」
林卓廷就冇梁金成咁留一線，直接喺回應嘅第一個點就暗寸梁金成無能。佢冇回應係咪有問過梁金成要唔要繼續選彩園，但就話上次區選之後，「林子琼長期恒常服務彩園彩蒲區......反觀梁先生鮮有地區工作，正如梁先生所言『有能者居之』，選民支持林子琼參選彩園區實順理成章，絕非其所指的『不義之舉』。」
林卓廷仲話，自己致力打擊水貨，亦經常喺上水開街站幫市民，上水居民有目共睹，「今次選舉必定是『民主派』和『保皇黨』之爭，希望各位選民集中票源，全投『民主派』，以免『保皇黨』漁人得利。」擺明唔想人投畀梁金成。
咁街坊點睇呢？上水地區群組度亦都有啲人討論下，「Wing Liu」直接地話︰「林生過去4年跟（根）本冇時間理石湖墟，完。」「Singsing Arsing」曲線地話︰「林卓廷『一表人材』，就等佢專心做立法會議員啦。」
「Ho Sing Lee」爆料︰「『叫金金去第二個區啦』，林姓議員不嬲都係咁霸道。未做議員居然可以開辦事處，邊個唔聽佢話就cut（削）資源，調走職員，講說話又唔夠識大體，得罪人多。如果唔係點解搞到眾叛親離。」
王岸然：高佬4年乜都無做
反對派時事評論員王岸然（黃覺岸）就話︰「原來高佬（意指林卓廷）搵人去界（鎅）金金票先，咁即係幫彩園位資深建制賣人情啦，－定支持金金趕走高佬，睇住高佬4年來，乜都無做過。」
石湖墟選區參選人仲有新民黨、公民力量孔永業；彩園選區參選人民建聯蘇西智，同埋報稱「社會工作者」的黃成智。 ■香港文匯報記者 甘瑜