貼停車場走火路線及樓梯位置 網民盼警速拉人
「天網恢恢，疏而不漏。」呢句說話真係好啱㗎，半年前做過嘅壞事，都隨時可以俾人發現，講緊嘅就係民主黨立法會議員林卓廷。話說立法會今年6月12日俾暴徒衝擊，搞到打仗咁款，原來喺前一日、即係6月11日，林卓廷曾經喺facebook貼出立法會停車場走火路線及各樓梯位置畀網民「參考」，有網民更喺7月1日立法會被攻入破壞後留言多謝佢「幫手」，話「有圖先可攻入立法會」𠻹。唔少網民都指出，「熱血公民」立法會議員鄭松泰都因為協助暴徒衝擊而被控串謀刑事毀壞罪，林卓廷今鋪斷正，希望警方快啲做嘢拉人咁話。
■香港文匯報記者 甘瑜
立法會喺修例風波中成為煽暴派慫恿暴徒攻擊嘅目標，6月11日，林卓廷就喺facebook出post，話「未來一星期立法會形勢緊急」，然後貼埋立法會停車場、即係LG1層嘅走火路線及各樓梯位置畀大家「參考」咁話，嗰個post都有成140個轉載㗎。嗰幾日，班煽暴派已經一再叫人去包圍立法會，幅圖畀人「參考」啲咩，相信都唔使畫公仔畫出腸。
喺6月12日朝早，網民「Raymond Lam」就留言多謝林卓廷「神助攻」。到7月1日立法會被暴力衝擊，至到7月2日凌晨，即係班暴徒「佔領」議會時，亦有唔少人轉載佢幅路線圖。實有班盲粉會辯護佢只係上載咗幅圖，冇真係協助人做壞事喎，但「Suli Lee」事後就喺林卓廷個post度留言打佢臉︰「多謝林議員幫手，有圖先可攻入立法會。」
「有證據告佢啦，唔好放過」
呢件事噚日又開始喺facebook上瘋傳，有人就將林卓廷個post整成圖，直指林卓廷「公開立會地圖予暴徒『參考』」，唔少網民都對佢呢啲協助暴徒攻擊立法會嘅行為感到憤慨，認為一定要DQ咁樣嘅「議員」，兼要求警方拉人做嘢。「Rita Chan」話︰「林卓廷根本係犯罪分子！」「Mashal Yim」亦話︰「佢有教唆犯罪嫌疑。」「Kam Yu」認為︰「有政（證）據告佢啦，唔好放過這賤人。」
有網民指出，鄭松泰已經因為7月1日協助暴徒衝擊而被控告緊，期待緊今鋪斷正嘅林卓廷都可以盡早被繩之以法。「Gigi Lee」問︰「唔係咁都入唔到佢罪係化？」
「Benny Leung」批評︰「好白痴，搵人打自己工作地方。」「Cheong Ice」亦反問︰「其實做呢D（啲）行為，對民主有咩幫助咩？香港冧咗呇a（哋）有什麼得益呢？」「Yuk Lin Cheng」直指︰「『泛民』班政棍，禍害青年，煽動仇警，根本唔配做立法會議員，只會危害香港市民。」