■李施嬅（左）自言一向怕血及睇恐怖片。香港文匯報訊 （記者 梁靜儀）李施嬅與海俊傑昨日到將軍澳電視城為節目《娛樂大家10點半》擔任嘉賓，並為新劇《法證先鋒IV》合唱的新歌宣傳。
施嬅表示原定於月底飛往加拿大拍劇，因新冠肺炎疫情問題劇組希望她提早過去，所以這兩日要完成所有劇集和劇集主題曲的宣傳，然後啟程飛往加拿大拍劇：「因加拿大航空已取消好多內地航班，對方都好緊張，（抵埗後可需隔離？）佢哋冇講，只係怕我去唔到無法開工，所以要求我提早起程。」
施嬅表示今次是首個歌曲作品，花了很多心機去唱，但擔心同時與劇集一齊宣傳，怕首歌會銷聲匿跡。她又笑指海俊傑的太太很好，常叫老公多約她去拍拖談情培養感情：「我未見過呢啲太太，真係嚇到，叫老公要愛我多啲，仲叫佢情人節約我。」她笑謂情人節就沒有約海俊傑，去了一位女性友人屋企吃飯。至於上周生日，就訂了房與「胡說八道會」好姊妹吃飯：「呢段時間幾乎冇人約我食飯慶祝生日，但一班好姊妹仍堅持陪我，胡杏兒屋企有大有細仲出嚟食飯，好感動。」
談到好拍檔陳山聰宣佈造人成功，施嬅開心表示其實早於台慶頒獎禮時已知道，所以忍口忍得很辛苦：「山聰真係好厲害，講咩就中咩，話結婚就結婚，話生仔就生，𠵱家畀佢中咗，其實宣傳《金宵大廈》時已聽佢話要造人，佢都好叻仔。」
另外，施嬅和謝雪心（心姐）日前接受主播許文軒(Edmond）主持的TVB娛樂新聞台節目《StarTalk》專訪，大談合作新劇《法證先鋒IV》感受。
施嬅表示她在新劇的感情線重點落在她和心姐身上，而她為了拍攝解剖場口，事前做了很好多準備功夫：「睇咗好多恐怖片去克服，初初真係睇到反胃，慢慢開始習慣，但係我計漏咗一樣嘢，就係解剖嘅時候有好多裸體，真係好尷尬，全部都係真人，個個都淨係着條短褲仔，我仲要觸碰佢哋，（好有艷福？）哈哈！真係男女、大隻、肥瘦咩都有，睇吓你有咩喜好啦！」