■健吾寸黃之鋒的fb長期將賣口罩的帖置頂。 黃之鋒fb截圖要食人血饅頭，事前應該要睇吓自己同人有冇牙齒印。原名葉鍵濠嘅商台節目主持健吾近日眾籌50萬元出書，話要從「非泛民非建制派」角度記錄舊年修例風波起到今年嘅香港，結果因為本書第一章暗踩「中箭（香港眾志）」羅冠聰（羅三七）唔理香港、走去外國讀書，引起「中箭」秘書長黃之鋒（河童）不滿，鬧健吾「唔公道」，仲聲言羅冠聰喺修例風波好有角色咁話。唔少「黃絲」亦留言狠批健吾，話唔會捐錢畀佢食人血饅頭，不過人哋噚日傍晚已經籌到55萬有多，超額完成任務??。
睇返健吾喺眾籌網站透露嘅第一章內容，佢其實係想幫「港獨」分子梁天琦之流出聲，覺得佢哋負責坐監，光環就俾啲「政治新星」攞晒。其中一段就話有「年輕的政工作者批評年老政工作者」，而嗰個「年輕政工作者」就曾參選、當選、被DQ，攞到獎學金嘅經濟支持就去咗讀碩士，「香港發生幾多事都沒有回來，直至自己養了多年的狗掛掉，才回來香港奔喪。也許他已經退出了香港的政圈，要到美國作更好的發展。」明眼人一睇呢番說話就係寸緊羅冠聰。
健吾眾籌爆料被「黃絲」杯葛
寸羅冠聰啫，黃之鋒點解要出聲？其實健吾篇文都有寸緊黃之鋒㗎，其中有一句就唔點名咁話「由一個『年輕政治明星新希望』，留在香港的，變成幫地區人士採購口罩」，而黃之鋒facebook到??家仲置頂緊佢批口罩抵港個post。
黃之鋒前日就喺fb出文寸健吾，話羅冠聰早喺修例未被關注時就去咗美國國會聽證，去年6月9日、6月12日、6月16日都喺街頭，7月1日都喺金鐘??，「當然我地（哋）無講身處金鐘邊度。」
佢質疑健吾話羅冠聰冇返嚟係「唔公道」。喂阿哥，修例風波大半年喎，不在港起碼4個月都唔畀人話佢置身事外，咁樣話健吾講嘢唔公道似乎都唔係好公道嘅。不過，黃之鋒嘅支持者就當然一面倒鬧咗健吾先算啦。
fb專頁「爵爵&貓叔」都分享咗健吾眾籌出書嘅事，想大家支持，但有班網民就叫「爵爵&貓叔」要謹慎交友。「Janice Li」話︰「健吾不了。他做得最多的是潑冷水，他現在做這件事看來十分諷刺。」「Phyllis Tsoi」亦話︰「我覺得他現在才是吃人血饅頭那一個。」「Jade Au」指出︰「《蘋果》咪已經出左（咗）本珍藏集。」所以話食人血饅頭時機都好重要㗎。
不過，健吾自己都有唔少支持者，噚日傍晚已經籌到55萬元有多，已經超額完成任務，仲可以籌多60日??。健吾亦冇在意人哋話佢食人血饅頭，仲反問︰「一群『恥於賺錢』的人想改變世界，怎會成功？......他們不會賺錢，不能自給自足，連（黃色）經濟圈都不能成立，怎說黃色？怎去改變世界？」
網民譏只准自己發災難財
「Jerry Chan」撐健吾話︰「其他人唔可以賺，但『泛民』政客可以。」咁又係，「中箭」成日眾籌、有口罩賣都想眾籌，又何必阻人發達呢？ ■香港文匯報記者 甘瑜