■鄭文傑在英國成立咗個所謂「英國港僑協會」。 鄭文傑fb截圖只要夠膽大大聲抹黑內地，「黃絲」分分鐘當佢領袖，殊不知人哋只係當佢哋水魚。由嫖客變「政治難民」嘅英國駐港總領事館前職員鄭文傑，早前到英國後開啟「黃絲領袖」套路，先成立咗個所謂「英國港僑協會」，然後嗱嗱聲搞眾籌，聲稱話要「協助香港人」，啲「手足」以為多咗根救命稻草，已經達成佢三分一掠水目標𠻹。不過，近日就有同路人踢爆，原來個協會「講到明唔幫『流亡手足』」，就算入佢哋個Telegram群組講「手足」嘢，都會俾人踢，唔少「手足」都感嘆，啲「黃絲」隨隨便便就科水，「黃圈」啲錢真係易呃。
鄭文傑舊年8月去深圳公幹，之後「失聯」，後尾被揭原來佢因為嫖娼俾當局按行政規定拘留15天。期滿獲釋返港後，鄭文傑閃閃縮縮避談自己風流韻事，係咁話內地向佢酷刑逼供，但身上就一啲傷痕都冇。
雖然係咁，「黃絲」都信到十足，將佢當成「政治難民」，由嫖客變政客就係咁簡單。佢去咗英國之後，亦多次肆無忌憚公開唱衰香港、抹黑內地，吸引到唔少「黃絲」注意。
早前佢就順勢成立咗個所謂「英國港僑協會」搞眾籌，聲稱籌款目標10萬英鎊（逾100萬港元），話要「建立一個可以讓香港人面對面交流的地方」。 網民「鍠鎷」日前就喺連登發帖幫鄭文傑個「英國港僑協會」眾籌宣傳，佢話：「一半都冇，得三分一，點做野（嘢）架（㗎）！」仲貼埋個眾籌連結。
入群組討論「手足」即踢
網民「純水溝油」見佢係咁叫人科水，就發帖奉勸班「手足」：「科水之前，只（至）少入佢個TG谷（Telegram群組）睇下（吓）咩感覺先？」佢話鄭文傑「講到明唔幫『流亡手足』，係（喺）（Telegram群組）入面講『手足』野（嘢），會比（俾）admin（管理人）×『唔正經』，你（唔）聽話夾硬要講，（就會）比（俾）人踢！」佢仲話：「入面90%討論都係邊度買樓、讀書有當地熟人介紹，見有人問搵工、落腳問題，就比（俾）人叫上連登問！」
至於個眾籌，「純水溝油」話︰「籌左（咗）既（嘅）錢去邊無交代，籌唔夠點算無交代，香港人唔好一聽到要籌錢就衝去買『續（贖）罪券』啦！」奉勸大家捐錢前要三思。 隨即就有人附和。有網民就認為從嫖娼單嘢就知鄭文傑本身冇誠信，搞嘅眾籌信唔過。「陌生的人人」就話：「無人知d （啲）錢點用， 佢cap （掠）晒都得， 真的不了！」「神奇地瓜」就直頭話，咁都呃到幾十萬，「港×真係好呃！」 ■香港文匯報記者 黃書蘭
