成班幕後大佬「叫人衝」，成日話會有「家長」提供呢樣支援嗰樣支援，但當血氣方剛嘅年輕人走去衝然後瀨咗嘢後，呢班人就一句「關人」囉！同啲「黑暴」行得好埋嘅音樂人霍朗齊日前喺facebook發帖踢爆，有大台掛名律師錢收足、Hea做嘢，話自己提醒佢去監獄探「手足」，就被鬧干預工作，又爆料另一個黨嘅律師冇關心某個「手足」令佢被通緝好耐，仲要有精神健康症狀嘅「手足」被最少15隊「家長」遺棄。雖然佢冇開名，但睇嚟都知被利用完嘅「手足」日子唔好過喎。
霍朗齊日前喺facebook發帖話，「我真係要××啲喺大台掛名律師，你哋真係好大嘅氣焰，連我都怕咗你地（哋）。」佢話自己只不過提醒嗰個人去監獄幫個忙探小朋友，就被話「我唔鍾意人哋干預我哋嘅工作，你有本事就過嚟簽文件轉律師，香港唔係得你哋一個手足出事。」
霍朗齊鬧返佢哋「錢就收足、嘢就Hea做」，仲唔開名鬧另外一個「某黨律師」，「如果唔係你冇比（畀）啲關心個小朋友，佢就唔會俾通緝咁耐，小事都變大事。」
網民「CC Wong」附和：「大台律師被人詬病都唔係第一日既（嘅）事，佢地（哋）點對手足，他朝香港人點對佢地（哋），唔好以為冇人知。」「Juksing Zang」就估計係「公民黨」。不過，實際佢指緊乜人就冇人知啦。
除咗呢個，霍朗齊仲提到仲有啲人叫佢將個高效能精神健康症狀嘅「手足」畀其他「家長」湊，佢就爆出，「個小朋友已經被最少15隊『家長』遺棄，佢仲可以去邊？」可見啲人係點對待「手足」咯，開心就關心下，唔啱心水就放棄？都要勸下啲「手足」下次都要醒醒定定，唔好為唔知乜人賣命啦！
■香港文匯報記者 鄭治祖