就住攬炒派議員是否喺立法會延任嘅問題，香港民意研究所真係費煞苦心，係咁搞民調，唔怪得畀人質疑唔搞到個心水嘅結果唔罷手。不過，佢哋噚日宣布今個星期搞嘅網上問卷訪問結果，都係有超過一半受訪者希望攬炒派議員全部離開，但佢哋就放話希望攬炒派可以提供「多啲選項」。唔少網民就愕然咁問，唔係講好咗跟民調咩？不過都有人放棄咗同班人表達想法，直情話既然點都阻止唔到佢哋入議會，不如畀佢哋入啦，咁可以等全世界睇下佢哋真面目。■香港文匯報記者 鄭治祖
香港民意研究今個星期一至星期四喺網上搞咗個問卷，訪問咗17,460名12歲或以上的香港市民，其中攬炒派支持者有14,563名和非攬炒派支持者有1,491名。問卷問題係「你認為民主派（攬炒派）立法會議員可以用哪種方式處理是否繼續出任立法會議員的爭議？」受訪者可選多項答案。
僅24%同意「全部留任」
佢哋噚日發表結果，50%嘅攬炒派支持者同埋58%嘅非攬炒派支持者都同意班攬炒派「全部離開」，以攬炒派同非攬炒派支持者各佔一半計，都有54%受訪者支持佢哋「全部離開」。
合計攬炒派和非攬炒派嘅支持者，24%同意攬炒派「全部留任」，其餘「個別議員自行決定」、「部分留任部分離開，名單由攬炒派集體決定」同埋「民調、公投、被DQ的留任而其他離開」嘅選項分別都唔夠15%人選擇。
民主黨（白鴿黨）早前帶頭將個波踢畀民研所，而中大政治及行政學系副教授黃偉豪噚日就喺記者會上亦為佢哋開脫話：「民調不能解決分裂和互相指摘。」
佢仲話攬炒派應提出更多選項畀市民，例如問卷中嘅「個別議員自行決定」等，又「解讀」話所謂「非攬炒派支持者支持攬炒派總辭比率，多於攬炒派支持者」嘅結果係「佢哋希望攬炒派議員離開後，會減少『拉布』等行動，讓議會能加快運作」。
講咁多，佢似乎都係出口術，要證明返班「飯民」留喺議會嘅作用。聽呢啲話音，唔知白鴿黨委託佢哋個調查，如果結果係要佢哋總辭，到頭來會否作數。
辯稱長期跟進 非「問到滿意」
「我們香港人」計劃名譽總監梁啟智則稱，今次嘅民意調查與白鴿黨委託嘅調查無關，又稱今個星期繼續調查有關立法會議員去留嘅問題，並非如坊間所指係「問到有滿意結果為止」，而係希望能夠長時期跟進問題，社會大眾網上投票結果亦顯示希望繼續詢問此問題。
由中文大學「獨」講師劉正主理嘅fb專頁「無神論者的巴別塔」就發文質疑：「根本鍾劍華呢條學棍就係同飯民夾計，特登響問卷入面加多幾個選項，務求拉散『全體杯葛臨立會』嘅比率。而??家無論限選一項定可選多項，飯民支持者要求『總辭』嘅比率都唔夠三份（分）二，飯民政棍多呃一年錢嘅目標，又近多步。」
「Kitty Chung」愕然道：「乜唔係跟民調咩？」「Andy Hung」揶揄：「結果一早知啦。」「香港政確 - Hong Kong Correctness」就「預言」：「咁多選項，一定分薄咗『走』的百分比，然後就話唔夠2/3。」
「Sammi Chan」就話：「賣港賊人多蝦人少，你哋點都阻止唔到，倒不如留翻（返）賣港賊係（喺）議會玩個夠，咁就可以比（畀）全世界都睇到佢哋嘅真面目。」「Wetzlar Tang」就話要「制裁所有加入非法議會的人」喎。
