攬炒派嘅兄弟情真係好脆弱，同佢哋塊臉皮一樣咁薄弱。由於立法會議員延任一年，今年無緣晉身議會嘅「抗爭派」連日狙擊傳統「飯民」，幫「主留飯民」搞「決定性民調」嘅香港民意研究所自然不能倖免，講明支持「飯民」留任嘅香港民研副行政總監鍾劍華更成為箭靶。面對「抗爭派」支持者鋪天蓋地嘅質疑，鍾劍華嗰塊紙咁薄嘅臉皮終於承受唔住，大呻近日受到來自「飯民」支持者嘅滋擾，仲批評用「齊上齊落」嚟迫傳統「飯民」辭職嘅「抗爭派」，喺民主黨林卓廷因去年「元朗7．21」暴動案被捕後失晒蹤，又警告「連我都搞，我就一定翻（反）枱！我就日日都篤爆你哋啲虛偽！」
「主留飯民」知道有得延任紛紛表態想留喺議會，但礙於同「抗爭派」「行得太近」而騎虎難下，對議席欲拒還迎嘅「飯民」唯有自辦民調嚟決定去留。
受委託嘅香港民研面對呢件苦差，本周就用類似題目做民調嚟試水溫，方便喺正式民調時做好「對策」，點知就被「同路人」發現份問卷古古怪怪，連早前被控暴動罪但無罪釋放、被稱為「赴湯杜火」嘅湯氏夫婦亦喺facebook揶揄：「個民調真係好民主喎......可以全部剔晒，然後就話要過半數『黃粉』投到其中一項過半數支持先算數，今次可謂無所不用其極！」
鬧過橋抽板冇撐林卓廷
連日被炮轟嘅鍾劍華終於忍唔住反咬「同路人」，喺fb大鬧「抗爭派」非常過分，聲稱佢哋被拘捕時，大多都係由「溫和泛民」安排保釋同搵律師，點知林卓廷前日涉暴動被捕，「抗爭派」就失晒蹤，更質問「點解而（??）家又唔使講齊上齊落？要人辭職就一定要齊上齊落 ？唔好咁虛偽得唔得？」、「我有時覺得你們裏面某些人的作風，與你們口口聲聲說要打倒的那個政權根本沒有什麼分別！」
批「自以為代表主流」
佢其後再打咗兩千字嚟抒發，仲引用埋《詩經．鄘風．載馳》嚟批評責難佢嘅人狂妄稚愚，又聲稱雖然佢曾表態支持「飯民」延任，但唔等於民調會造假喎，又明寸「抗爭派」「自以為代表主流」、「以為掌握民主真理」，仲反問「因為不符合自己的心意，便從否定民調機構及民調執行者入手。這算是什麼民主素養？」
雖然佢以為自己一片「丹心」照明月，但實質上照緊嘅只係自己嘅糞渠，好似網民「Ben Leung」就反問：「教別人如何如何之前，捫心自問，自己做過甚（什）麼？」
「Kayi Cheung」就話：「點解講到好似你哋就係聖人咁？今日局面角色調轉你仲講得出呢啲說話嗎？」
「Trevina Wong」就勸佢接受事實：「對住佢哋（『抗爭派』），講理是冇用，佢哋目的不是像『和理非』咁睇理據重分析，佢地（哋）扣一個人帽子而自利！」「曾慶昌」亦話：「都係嗰句，如果班小朋友覺得佢哋搞得掂，咪放手畀佢哋去囉，做人點都要交啲學費，最緊要×街唔好喊。」
■香港文匯報記者 鄭治祖
