《三國演義》嘅人物劉備講過：「兄弟如手足」，但公民黨林瑞華就親身演繹乜叫「手足如衣服」。事緣警方日前就去年元朗7．21事件採取行動，以暴動罪拘捕咗多名攬炒分子，但諗唔到身為「同路人」、早前諗住競選立法會飲食界嘅林瑞華，第一時間唔係去接觸被捕者同了解佢哋嘅需要，而係眾籌20萬元嚟喺《蘋果日報》登頭版廣告，話要「記錄」香港人嘅憤怒喎。結果當然有「黃絲」盲從捐錢，但就有更多人批評林瑞華不切實際，寧願攞20萬嚟登廣告都唔資助吓啲失業「手足」，仲要係有案在身嘅飲食界「手足」哦。
林瑞華前日喺facebook發起眾籌，聲稱港人已目睹政權試圖「篡寫7．21歷史」，為咗「守護記憶」、「光復真相」，所以希望大家籌夠20萬元畀佢，喺下月1日登個《蘋果》嘅頭版廣告喎。
佢仲好熱心咁設計晒成個廣告嘅構圖，無錯，8句句子冇相冇圖案，盛惠20萬元。佢仲好「透明」咁話畀大家聽，20萬元入面有兩萬係手續費，如果最後超出目標金額，先會捐畀啲「人道支援基金」。
網民睇唔過眼倒錢落海
網民「maymay suen」就睇唔過眼：「廿萬登個廣告咁貴都算，仲要有兩萬係手續費？有錢都唔係咁倒落海啦！」「Yun-Kwan Yiu」亦質問：「有多餘錢幫幫幾個無工開無飯食嘅『抗爭者』都好吖！只係畫面靚有乜意思？」
「Ken Wong」就提醒大家：「以前吳文遠買頭版廣告都唔洗（使）20萬！」原來社民連嘅吳文遠去年亦有為喺《蘋果》登頭版廣告眾籌，但當時索價只需11萬元，究竟點解一年之間貴咗咁多？
「熱血公民」副主席鄭錦滿亦嚟湊熱鬧，唔止發帖tag咗林瑞華，仲留埋自己手機號碼：「小弟認識幾位有案在身的飲食界從業員，因『武漢肺炎』關係冇工開，需要幫忙生活費，請閣下儘（盡）快與小弟聯絡，幫幫『手足』。」
不過，我哋發現「黃絲」又真係寧願倒錢落海，截至噚晚9點，林瑞華嗰眾籌已經籌咗逾13萬，睇嚟喺「黃絲」眼中，「記錄憤怒」真係遠遠緊要過「手足」！
■香港文匯報記者 鄭治祖