■周柏豪（左）有了女兒之後改變不少。香港文匯報訊（記者 李思穎）周柏豪近日推出新歌《劫後餘生》正是為自己這一年的慘痛經歷打打氣，當然女兒也是他的快樂泉源，每天清早給女兒錫到成面口水令他甜到入心。
柏豪接受訪問表示：「冇出歌呢一兩年時間，自己有好多低潮，發生咗好多事，對自己嚟講係好慘痛，一生人都唔想再發生，呢首歌可以話係同大家和自己打氣，初初唱嘅時候要投入情緒，每次都好激動，會諗返好多當時嗰種恐懼感，現時每次都好期待唱呢首歌，因為每次都有唔同嘅釋放，唱完自己會開心咗。」
受疫情影響下，柏豪反而有更多時間陪伴女兒，他說：「見證到女兒多個第一次，包括叫我爹爹，不過阿媽話我太太出街好耐未返屋企時，囡囡話媽媽曳曳，呢個我好想見證一下，哈哈！」他還透露：「阿女每朝都錫到我醒，佢會爬上嚟，上唇下唇都錫，搞到成面口水，係好冧！可能同太太拍拖太耐，都15年，所以同囡囡一齊嘅感覺更強烈，（擔心太太會呷醋？） 唔會，你估淨係錫我咩，囡囡錫佢先錫我㗎！」
柏豪有了女兒之後改變不少：「𠵱家屋企會聽多咗兒歌同古典音樂，以前會聽樂隊同傷感嘅歌，始終電波會影響BB，所以太Moody唔係咁好，仲有工作完想飛快回家見佢哋。」