■歐陽震華重提當年昏迷事，而宣萱則冇打算結婚。香港文匯報訊（記者 梁靜儀）歐陽震華（Bobby）與宣萱應邀擔任崔建邦及張秀文主持的訪談式節目《諸朋好友》嘉賓，宣萱被兩位司儀封為最旺夫的女主角，因很多跟她合作過的男星都攞獎，問到她可期待搵個真命天子？她說：「去到呢個年紀真係冇所謂，因為見到身邊嘅朋友，可能唔開心嘅佔咗七成，令我睇到唔一定要結婚，除非想生小朋友就要結啦，否則都係搵個伴侶。」
節目中Bobby重提2013年在朋友家中昏迷要送院急救一事，Bobby大方回應：「好多外界傳我飲酒過量中酒精毒，咩都有，但有冇記者影過我一張畀人抬住走嘅相？好多以為我係飲過量酒，我承認嗰晚係飲咗少少，可能不知如何吞咗一啖落個肺，造成肺炎，唔知道塞咗個肺，後來屋企人叫我，見到我塊臉變紫，再遲啲就僵硬，唔止變青咁簡單，於是送去醫院。」
Bobby指當其時是有些意識的，知道被抬過牀及檢查瞳孔，有嘗試過郁動手指，更出現靈魂離開身體見到自己的感覺：「後來醫生有和我講返，天蒙光時我已經走咗，但8、9點時又返來......佢哋唔係睇我個樣，係睇數據跌落去，若果再跌落去就可能會（死），我血壓又突然回升，即係我『返返嚟』。醫生話我哋可能係做戲捱得眼瞓，能力係強過普通人。」他笑言自此之後做了很多以前未做過的事，待人又好一點及學會珍惜現在。