●劉頴匡批評潛逃者得把口，直言聽到佢哋講嘢好唔舒服。fb截圖逾50名攬炒分子涉嫌組織或參與「初選」，違反香港國安法，潛逃到海外嘅攬炒分子淨係識講風涼話叫佢哋「唔好驚」、「唔好畏縮」，順便攞吓光環。「民間集會團隊」發言人劉頴匡噚日就喺facebook發帖譏諷呢啲攬炒分子，直言聽到佢哋講嘢好唔舒服，即係叫佢哋講少句喎。
當仲身處香港嘅攬炒派俾人拉，走咗佬去海外嘅就即刻出嚟刷存在感，叫外國「制裁」呢樣嗰樣。面對呢班攬炒分子䟴䟴腳地用嘴嚟輸出力量，敷衍地叫加油，劉頴匡就直言好嬲︰「叫香港人唔好驚、唔好畏縮等等嘅鼓勵說話無問題，但可唔可以唔好係由本身就因為驚所以『流亡』海外嘅人講？」佢仲話身為喺香港「承受緊一切」嘅人，「坦白講聽到唔係好舒服。」
唔少網民都熱烈附和，「Chun Hang Law」話︰「佢地（哋）仲有句收埋左（咗）未講：最多咪移民就得，頂住。」「Shu Shirakawa」和應揶揄「新口號：香港人，移民！」
陳國強和應「聽到都想嘔」
前沙田區議員陳國強亦話︰「每次聽到班『大哥』叫我哋......繼續對抗『暴政』！聽到都想嘔！班『大哥』走咗就講風涼話。」前大學講師陳士齊則反問︰「其實呢D（啲）人有冇brain（腦）架（㗎）？」
其實又無必要咁勞氣，畢竟佢哋係乜嘢人大家有目共睹，「大家衝，佢哋鬆」嘛。 ●香港文匯報記者 郭家好