●攬炒派47人待審，劉慧卿高舉勝利手勢拍照。張國鈞fb截圖攬炒派47人被控「串謀顛覆國家政權罪」，連續數日開庭審訊。唔少攬炒派支持者都去咗西九裁判法院外聲援，宣稱要同班攬炒派「齊上齊落」，而民主黨前主席劉慧卿亦都有出現㗎，不過佢嘅心情似乎唔錯，笑容滿面咁同人合照，仲要比個V字手勢，如此唔體恤班同路人嘅心情，唔知佢啲黨友知道佢嘅表現會做乜反應，不過網民就好理解佢呢啲自然而然嘅情感流露，話佢成功甩身，梗係開心啦。
民建聯立法會議員張國鈞早前就喺fb post咗張相，相中見到劉慧卿一身黑色打扮，同另一名身穿黑裙嘅女子合照。劉慧卿舉起勝利嘅手勢，心情明顯同相中後方排緊隊嘅人形成極大對比，唔知點解佢咁開心呢？張國鈞就留言譏「黨友被控上法庭，但睇下劉慧卿幾開心」，佢仲猜測劉慧卿一定有睇佢哋嘅節目，《睇人××最開心》。
唔少網民都好踴躍留言，競猜劉慧卿咁開心嘅原因。「Simon Tang」估「可以置身事外，梗係笑得出啦。」「Lonnie Diu」就話：「趕走班爭飯食嘅，滅絕師太可以重操故業梗係高興！」「LizzyWing」更加覺得：「可以?（幫）黨友係（喺）出邊衆（眾）籌，何樂而不為？」而「Philip Cheong」就話：「佢嘅意思係成功甩身呀！」
有人問鄺俊宇係咪篤灰王
而同樣有份參與「初選」嘅民主黨前立法會議員鄺俊宇就獲警方批准續保，暫時未被起訴。唔知佢係咪以為自己大步檻過，日前就喺fb度貼出一張相片，好悠閒自在咁喺書局度睇書。人哋就被拘留等上庭，佢就置身事外行書局，真係唔知係想攞景定贈慶啦。唔少網民見狀後都即刻鬧爆鄺俊宇，揶揄佢「識時務者為俊宇」，更加有人懷疑佢係「二五仔」、「篤灰王」，亦有網民留言話：「『手足』就坐監，佢就行書局講風涼說話。」
本身貼張圖出嚟刷下存在感，想引班黃絲一齊圍爐取暖，結果竟然惹嚟群情洶湧嘅批評，難怪鄺俊宇只好急急腳咁疑似刪帖，立即避風頭啦。 ●香港文匯報記者 倪思言