攬炒派47人被控「串謀顛覆國家政權罪」，過去幾日喺西九龍裁判法院受審。雖然法院已提醒公眾要遵守《刑事訴訟程序條例》規定，但網上仍有人違法披露各被告嘅保釋申請陳詞。好似潛逃美國嘅「港獨」分子梁頌恆噚日facebook就以「收到庭上消息」為題，違法披露有人為保釋搖尾乞憐。唔少「手足」睇完都話好嬲，鬧爆班人「做晒死狗認晒錯」，質疑佢哋「而（𠵱）家先扮弱者」？
梁頌恆噚日喺fb發帖，暗示叫記者畀料佢。佢話：「記者朋友們，如果你地（哋）受制於那些濕×限制，不能把法庭裏有一些有意思的畫面說話寫出來的話，可以嘗試以安全的辦法聯絡離散在外的香港人代出。」佢仲連發多帖，違法披露有關陳詞內容，擺明踐踏香港法治。
梁頌恆涉違法煽動 豈料反效果
不過，梁頌恆嘅行為反而大挫黃營士氣，有網民睇完班人哭訴仔細老婆嫩、願意遵守「最嚴苛」的保釋條件，「又跪又喊又拎埋屋企窮黎（嚟）講」等等嘅陳詞，都齊話成班攬炒派無骨氣。
「Walch」就話：「當初×『泛民』淋（腍）既（嘅），到而（𠵱）家連『勇武派』都要扮晒死狗，幾可悲！」「狂風掃浪蝶」亦鬧班人跪底：「為咗幾日自由去出賣靈魂，你話保證不起訴都話丫（吖）！」
有網民則覺得天網恢恢，食得鹹魚就要抵得渴：「出得黎（嚟）破壞預左（咗）啦！」「紅磚電王」就話：「保釋？想走佬呀？食左（咗）咁多年政治飯，出賣香港人，去坐啦民主黨！」「毛孩守護者」則話：「早知今日 ，何必當初！」 ●香港文匯報記者 黃書蘭