「La Tessa」話新人射波無糧出 網民：唔啱食就唔埋單？
「同路人」理應互相扶持，但「黃店」借名「試工」唔出糧，就擺明「搵水魚」。有網名「Andy Suen」嘅黃絲近日向攬炒派勞工團體「勞工組」投訴，自稱喺黃店「La Tessa」試咗一日工後冇糧出，仲話事後發現呢間黃店唔只一次呃「手足」，成功令「勞工組」喺facebook幫佢開post撐腰。面對大批網民圍剿，「La Tessa」連續發post解畫，聲稱事前已同新員工傾好必須先完成「Training」後再返齊編好嘅更先有糧出，又大呻以前請過好多頻頻射波又遲到嘅「手足」，所以先會訂立啲咁嘅協議嚟保障自己喎。●香港文匯報記者 雨航
「勞工組」近日刊登「Andy Suen」嘅投稿，佢聲稱自己喺「La Tessa」試咗一日工後冇糧出，經追問後對方竟然叫佢去勞工處。佢就形容「La Tessa」係環境極污糟嘅黑心偽黃店：「啲嘢跌咗落地又再用，唔明白點解人哋喺度煮緊嘢食，個個都要走入嚟食煙，明明自己有後行（巷）。仲話係黃店良心餐廳。」
「勞工組」就喺post內問網民應該點樣處理事件，估唔到以前支持違法黑暴嘅黃絲竟然拋出一堆法律知識，好似「Benny To」就話：「就算只係返咗一日工，僱員都有權攞當日既（嘅）工資，要返夠幾多日工先有糧出根本就係搵免費勞工，剝削勞工權益，已經講唔通。」「HK Zac」亦話：「睇落就係餐廳借『Training』之名攞人著（着）數。」
苛刻條件恰新人 唔返齊工無糧出
「La Tessa」其後就開post解釋事件嘅來龍去脈，聲稱當時請咗3位新員工，並「協議」好要先完成3天Training同返晒編咗嘅更先有糧出，但其中有兩個新員工未完成Training已經射波早退，剩低嗰位雖然已辭職，但因為「跟足協議」所以有糧出。「La Tessa」仲提醒大家珍惜工作機會，唔好希望不勞而獲??。
「勞工組」嘅王曉君就將「La Tessa」嘅帖文轉發到fb群組「黃色良心消費圈」，並批評：「試工三日之後先有得出糧（咁嗰三日人哋幫你賺既（嘅）錢你袋定『手足』袋）唔好講其他嘢轉移視線（不外乎都係話人射波之類，但你唔鍾意咪唔好請，咪訂埋晒啲×街協議）。」
「La Tessa」唔知係咪深知自己理虧，於是改為開post賣慘情，聲稱佢哋嘅「Training」只係「遞下（吓）嘢，又或者拎袋包入廚房嘅簡單工作」，「好多『手足』都會出現射波，嚴重遲到嘅情況，我哋都係為咗保障自己，所以先同員工訂立呢個協議」，「我哋為咗（受）Train嘅員工，而編多一個廚師番（返）工，一對一咁教，然後一日之後，（員工）唔再番（返）黎（嚟），我哋公司都有付出到。」不過，「Oliva Cheung」就突破盲腸：「遞吓嘢都要編多個廚師一對一咁教？」「KcoKco」亦話：「其實嗰（個）員工只係初初返工，根本冇必要咁快一對一搵個廚返多更咁教法，佢一唔做就浪費哂（晒）兩邊嘅時間。」
「Nok Yin Wong」就揶揄：「其實我第一次嚟依（呢）間餐廳食野（嘢）都付出左（咗）車錢同時間仲有卡路里quota架（㗎），如果啲野（嘢）唔岩（啱）食係咪可以唔使埋單？」「Sol Lo」亦笑言：「幾時開放試食，好味嘅我實畀錢。」