●張俊傑列出多項荃灣店嘅問題後，聲稱自己寧願白交租都要先結業。 張俊傑fb截圖千錯萬錯都係人哋錯，呢個應該係黃店龍門冰室老闆張俊傑嘅做人宗旨。龍門冰室近日頻頻告急，荃灣分店已於4月6日結業，唔少黃絲此前趁荃灣店執笠前專程幫襯，點知龍門嘅食物同服務質素惹嚟更多劣評。張俊傑翌日就喺facebook開post，列出荃灣店多項員工導致嘅問題，仲聲稱自己情願白交租都要先停業。唔知佢係咪想營造自己專注店舖質素嘅形象呢？不過，唔少網民都話荃灣店執笠，除咗員工有問題，張俊傑都有責任，叫佢唔好再賴地硬嘞。
大批黃絲早前紛紛應張俊傑要求蜂擁幫襯龍門嘅荃灣店，點知佢哋都頂唔順荃灣店嘅惡劣服務，喺網上大呻想食乜就冇乜、侍應要人加錢轉餐牌冇寫嘅嘢，仲要等成兩個鐘先有得食等。
聲稱情願白交租都要先停業
張俊傑喺荃灣店結業翌日就開post，列咗幾項店舖嘅問題，包括「一個快餐等45分鐘」、「下午茶時段唔會整正常餐牌嘅嘢你食」、「全間餐廳得幾個客但要你等半個鐘先開始整（嘢）你食」、「雖然仲係死約業主未肯放我走，但我決定先拉閘，就算白交租都要先停業，對唔住荃灣街坊」等等，矛頭直指該店嘅員工，佢咁講法，係咪想指荃灣店執笠都係員工一手造成嘅呢？
網民「記得初衷不放手」就喺「連登」轉發張俊傑嘅帖文，好可惜咁話荃灣店結業係因為「手足」/員工太懶散，希望張俊傑學好management（管理），但「灣仔區劉華」就搲晒頭：「你（張俊傑）係老闆，但餐廳有問題怪員工。」
網民：諗住自己唔使理 推畀員工
「6帽王何家成」就批評張俊傑：「淨（剩）係識得賴，永遠唔會係自己有問題」。「恆屍」亦話荃灣店結業除咗廚房問題，「更明顯係管理問題，你點指示員工，實在太多ON×食住熱潮開鋪（舖）又無（冇）生意經驗，諗住自己唔洗（使）管理，咩都推比（畀）員工」。「保羅翻譯」就幫撐張俊傑嘅黃絲設計對白：「千錯萬錯都係其他人錯，我老細無（冇）錯，by聾粉。」
「垃圾工程狗」就叫大家體諒吓張俊傑，事關佢「日日比（俾）鬥黃師追（狙）擊，剩係覆鬥黃師d（啲）問題都搞到冇曬（晒）時間，得鬼閒管到間鋪（舖）咩？」「燒賣魚蛋」亦幫張俊傑「護航」：「所謂既（嘅）黃『手足』返工態度差/做唔掂都唔係第一日聽啦。」 ●香港文匯報記者 雨航