●「連登」帖主近日回帶「龍門」告急帖文，俾網民大罵炒冷飯。 「連登」截圖就嚟一年365日都喺度告急嘅「龍門冰室」又故伎重施？網民「貓貓懷孕」近日就喺「連登」以「（突發）龍門冰室最後告急」為題開post，裡面貼出一個顯示喺4分鐘前嘅「龍門」fb post截圖，內文當然就係「龍門」大打慘情牌嘅告急文啦，結果個post就惹嚟大量負評，點解？原來帖主嘅截圖係嚟自「龍門」3月10日嘅post。過咗一個多月仲推返啲舊文出嚟幫「龍門」宣傳，難怪網民質疑帖主係「龍門」打手啦。
寓言故事《狼來了》相信大家都睇過，難為啲黃絲唔知俾人呃咗幾多次先終於醒覺。話說「龍門」嘅原post係講隨住政府先後兩次嘅「禁晚市堂食」，令餐廳入不敷支，積壓太多債務，「龍門」好可能捱唔住，希望各位香港人可以伸出援手幫佢哋捱過呢一關喎。
網民「疊羅漢」就好不屑：「又告急，想點啊，其實黃店一樣經歷同樣既（嘅)野（嘢）， 點解淨（剩）係得你告急。」「那須川天心」亦直言：「經營不善，點幫都冇用。」
「pop子」就踢爆呢個其實係「龍門」一個多月前嘅帖文，批評：「舊po（post）當新聞呃人入」點知帖主就理直氣壯、擘大眼講大話：「一個月都無點舊聞？」「pop子」亦唔順氣回應：「你咁鍾意回帶，唔好貼幾星期前確診數字當今日新聞。」
被揶揄「每月一告好快慣」
「札克雷」就貼出帖主的發文記錄，發現帖主連續多日，以每日幾個post嘅頻率宣傳「龍門」，並留言道：「hi PR（公關）。」「G+」就揶揄：「每月一告，好快習慣。」
●香港文匯報記者 雨航