|
李自明
以前人們常說「樹大好遮蔭」，但近年香港人反而聞樹色變，塌樹意外不時發生，塌樹壓死、壓傷途人，唯恐走避不及。有地區老友向自明坦言，雖然天災難料，現有機制確有應改善之處：「呢啲管樹嘅前線行政嘢，地區友就好著緊，但可惜無權，只能企効街頭望樹興嘆；有權的政府最高層官員日理萬機，有時間都諗吓點樣改善全港民生啦，邊有可能要佢哋知道全港邊一區邊條街邊棵樹有危險？香港投訴文化咁盛，前線冇上頭order就唔敢做嘢，難免出現『掛萬漏一』的情況，所以在地區問題上，『權力下放』一定好過『中央集權』。」
地區行政是特區政府施政的前沿，樹木管理不過是一小環節，但見微知著，多宗壓死、壓傷途人的塌樹意外，令政府飽受市民批評。
「中央」處理不及前線彈性
地區老友嘆言，「地區事應該地區了」：只有地區友最了解當區的實際情況、措施的緩急先後，而且可以即時反應，毋須經過層層官僚架構審批核准；當區內出現樹木有倒塌的危險，以至出現某街某巷某大廈的衛生情況惡劣，當區的議員為了選票，一定會緊張過其他人，搶崩頭要改善。但目前的問題是，任何問題都突然上升到「中央」層次，就像「樹木辦」，「你諗吓，當18區上百個甚至上千個要求都堆到政府一個行政部門時，部門都難免要按照既定程序辦事，例如要排優次、要考慮部門資源等等，未能夠即時反應，到真正落手落腳做，分分鐘要幾個月甚至幾年，真係做得來蛇都死啦！」
老友不禁「想當年」，指英國人在戰後將香港的「潔淨局」改組為「市政局」，負責種樹木、起泳池以至公共衛生等地區工作，及至特區政府於千禧年「殺局」後，食環署和康文署接管兩個前市政局的大部分職能，本意是在提升地區行政效率，但「市政」權力收歸兩個署後，有時候反而出現步調追不上實際的窘境。
他解釋說：「我有好多區議員老友日日收到投訴，樹木、垃圾站地點等一大堆芝麻綠豆小事，老友叫佢哋（地區官員）搞，冇咁勤力的就會用『多做多錯，少做少錯，唔做唔錯』的哲學來拖，勤力的亦必須按足程序辦事，由立案到調查確認有改善必要，到正式向總部提出改善建議，到審批，再到落實，你話要等幾耐？玩吓手改善措施未落實，有樹就倒下來，有老鼠四圍咬人，區議員同地區官員，包括真係有心做事但受囿於既定程序者固然要受靶，連最高層官員都要栢鑊，咁又真係何苦呢？」
讓區議員有責有權更積極
隨著2012年政改方案「通關」，立法會的區議會議席增至6席，區議會的影響力亦較以前大為增加。老友坦言，雖然《基本法》規定區議會只能是非政權性的區域組織，但說到負責提供康樂、環境衛生等服務就一定可以。既然區議會在立法會的力量已經大大增加，相應地，政府亦應該加強區議會在地區行政上的角色，增加他們在管理樹木、康樂設施等市政服務的權力，「一來可消除咗區議員成日說有責無權，亦可畀區議員有更多嘅主動性，放權讓利，令佢哋有責有權，更積極地參與地區行政事務。」
他又引用新加坡的地區行政為例，稱獅城才400多萬人，但亦設有5大社區發展理事會，專責處理地區行政上的工作，「咁講明地區行政與中央行政始終有一段距離，全港大局與18分區嘅小局雖互為影響，但亦要分而治之，才能產生最大合力，推進整個社會發展。雖然唔一定要恢復兩個市政局，但特區政府好應該諗諗，畀地區架構分擔吓日常工作，咁樣在地區行政上先可以達致更佳效率。」
|
