 放大圖片
香港文匯報訊 廖偉雄接受有線《星級會客室》主持汪曼玲專訪，暢談近況以及分享人生經歷。70年代開始拍電視劇的他最初由「茄哩啡」做起，自言以「一步一腳印」的務實方式實現理想，最後憑「阿燦」一角彈出，之後更發揮「搞笑扮嘢」本色，以笑匠形象闖出一片天。
90年代廖偉雄演藝事業如日方中，他卻急流隱退轉戰商界創業，原來大部分原因是為了太太：「做娛樂圈會接觸好多唔同類型嘅人，人際關係非常重要，成日都需要去應酬，同場點都會有其他女明星，老婆知道好唔高興。」他又指當時長時間拍戲十分消耗精神和體力，每次回家都累得倒頭大睡，因此經常被太太抱怨，甚至爭吵不斷。
婚姻關係緊張，廖偉雄坦言曾有離婚的念頭：「日嘈夜嘈都唔係辦法，當時諗一係離婚，一係離開娛樂圈，最後決定轉行係唯一解決辦法。我覺得兩個人可以喺埋一齊已經好難得，所以要好好珍惜對方，人生係一場學習愛嘅過程。現在出去傾生意都會帶埋老婆出去，佢認識埋啲客人，畀佢安心啲。」
淡出娛樂圈後，從商的廖偉雄曾投資過多個行業，嘗過成功亦遇過失敗，縱使跌倒，但他樂觀面對，更認為困難、失敗是一個學習機會：「經一事長一智，士兵都要打好多場仗先會成為將軍，如果人生過得太風平浪靜就唔會成長，遇到困難，我哋應該去諗點樣迎戰。」他亦提及美容直銷風波、破產、被追債等多場人生風雨，他認為以前太年輕而走錯不少路，不過種種經歷亦令自己有所成長。
從成敗得失中感受人生，廖偉雄指自己現在非常適合拍「喊戲」，因為容易被感動到哭。他亦鼓勵年輕人要逆境自強：「解決問題有好多種方法，最重要係唔好怕困難，要先改變自己嘅想法，正面啲去處理，如果一開始就已經唔開心，之後都只會一直唔開心。」
|
放大圖片
